Inooriaatsip nutaap nappaatit pilersitai akiussavagut

Nunatsinni peqqinnissaq eqqarsaatigalugu ukioq mannamut aningaasaliissutaapput 1,2 milliardi koruunit, nunanullu sanillersuuttakkatsinnut naleqqiullugit aningaasat taakku amerlanngillat.

Agathe Fontainip oqaatigaa, issittormioqatitta paasisaannik pissarsisarnissarput ilikkagaqarnissarpullu pingaaruteqartoq qujanassallunilu. Taamaattumik nunanut issittormiunut allanut suleqateqarneq annerusoq ujartortuartariaqaripput oqaatigalugu.

- Minnerunngitsumik ilisimatusarnerup iluani issittormioqatitta paasisaanik suleqatigiinnissarput Nunatsinni pisariaqartipparput. Taamatut suleqatigiinneq ingerlareeraluartoq taamaattoq tamassuma puigorneqannginnissaa pingaaruteqarpoq, Agathe Fontain oqarpoq.

Nunat issittumiittut Peqqissutsimut Naalakkersuisui aamma issittormiut inoqqaavisa kattuffiinit aallartitat, peqqissuseq pillugu siullerpaamik naapeqatigiinneranni Agathe Fontain qaaqqusisuuvoq.

Peqqissutsimut Naalakkersuisut allallu aallartitat ataatsimiinnerminni naqissuseqqippaat, nunani issittuni inuit nappaataat imminnut assingusuusut. Nunatsinnili aningaasaliissutaasartut nunanut allanut naleqqiullugit ikippallaarnerat eqqarsaatigalugit, Nunatta pisariaqartippaa issittormioqatitta ilisimaligaat aallaavigalugit suleqatigiinneq pisariaqartikkipput. Inooriaatsip nutaap pilersitaanik nunatsinni nappaatigineqalersimasut eqqarsaatigalugit aningaasarpassuit atunngikkaluarlugit paasisitsiniaasoqartalernissaa, Agathe Fontainip oqaatigaa.

- Isumaqarpunga inunnut toqqaannarnerusumik pasisitsiniaaneq allaanerusoq atortariaqarlutigu. Tassami inooriaatsip nutaap nappaatit nassatai inuiaqatigiinnut paasissutigitissallugit pisariaqarmat. Paasisitsiniaanermi pingaarnerutsinneqassalluni inuit namminneq qanoq inuuneqarnissartik akisussaaffigaat, Agathe Fontain naggasiivoq.