Inooriaatsimut café innuttaasut atorluarpaat
Peqqinnissaqarfimmi sulisuni oqaloqateqarniarlutik siuleriiaat Sovjetunioniusimasumi pisiniarfinni utaqqissunut assersuunneqarsinnaapput inooriaatsimut café uani sapaatip akunnerani ingerlanneqarmat. Assigiinngitsunik ukiullit 50-it missaat angerlarput peqqissusertik inuunerissarnissamullu tunngasunik ilisimasaqarnerulersimallutik.
- Assorujussuaq nuannaarutigaarput Nuummi innuttaasunit tapersersorluarneqarnerput. Inooriaatsimut café ingerlakkaagatsigu tamatigut 40-50-it takkuttarput aammalu ikinngitsut ikiorneqartariaqartut siumorsimallugit. Taakku inooriaatsimut nakorsiartarfimmi ikiorneqarnissamut innersuuttarpagut ikiorneqarnerallu tassanngaanniit ingerlaqqittarluni, inooriaatsimut nakorsiartarfimmi peqqissaasoq Jytte Lindskov oqarpoq.
Utaqqisut ilagaat Ole Petersen allaffimmiutut suliffeqartoq. Taanna nulianilu isumaqatigiissimapput isumatusaarnerussasoq pitsaanerusumik inooriaaseqalernissamut alloriaraanni.
- Nalunngilluinnarpara kilonik arlalinnik oqilisariaqarlunga aammalu timigissarnerulertariaqarlunga. Issiaannarluni sulisuulluni aammalu seeqqutigut gigt-eqarluni timigissarnissaq ajornakusoorsinnaasarpoq, kisianni neriuppunga qanoq ingerlariaqqinnissamut siunnersortissinnaassallunga, Ole Petersen nalunnerup saniatigut annerusumik timersorneq ajortoq oqarpoq.
Saaffiginnittoq alla tassaavoq 58-nik ukiulik Allan Larsen. Taassuma aavata sukkoqassusaata takutippaa sukkornermik nappaateqariaannanngorsimavoq, taamaammat angerlatigani nakorsiartarfimmut aqqusaartussatut innersuunneqarsimavoq.
- Assut iluarpoq pilertortumik maani suleriaaseqartoqarmat. Maanna paasivara qaqugu nakorsiartarfimmut saaffiginnissanerlunga aammalu suli allannguerusunnera pigitillugu qanoq iliuuseqartussanngorlunga. Inuuninni arlaleriaqalunga puakkut nuffersoortarsimavunga tamatumalu kinguneranik puama pisinnaasaat annikilleriarsimavoq. Taamaammat mianersortariaqarpunga siunnersuutaasinnaasullu naalaaqqissaarlugit. Iluassagaluaqaarlu inuunerma sinnera pitsaanerusumik inuuneqalersinnaaguma. Aamma maaniinnera soqutiginartunik pissarsiffiuvoq ilaatigullu paasivara sunik nerisaqarnera siunissami eqqarsaatigilluarnerusariaqarlugu, Allan Larsen aaammi sukkoqarpallaarunnaarsinnissaanut qilanaarluni oqarpoq.
Inooriaatsimut cafémut saaffinninnikkut allornernut kisitsissutinik pissarsisoqarsinnaavoq taamaasilluni nakkutigineqarsinnaammat ullormut qanoq aallatigisarneq. Inuit ilaasa tupaallaatigisarpaat ullormut qanoq uninngaannartiginertik, allornernillu kisitsissut iluaqutigalugu piumassuseqalersarput issiaannarunnaarlutik pisuttuartalernissamut.
- Nittartagaq www.amisut.gl atorlugu inuit allornitik allattorsinnaavaat aammalu ilissaminnik ilaquttaminnilluunniit ilalerlutik imaluunniit suleqatitik peqatigalugit iligiit allat unammisinnaallugit. Inuit 700-ut missaat tassani maanna peqataasarput peqqinnarnerusumillu inooriaaseqalernerup saniatigut unammillerusussuseq eqeersarneqartarpoq. Cafe-qartitsisarnerput aasap kingorna ingerlateqqissavarput tullianik aggustimi ammaqqissalluta. Neriuinnaassaagut taamanikkussamut aamma ulapputissaqarluarumaarluta, Jytte Lindskov oqarpoq ippassigami qimmuuttariaqartoq inuit peqqinnarnerusumik inuuneqalerusuttut ikiorniarlugit.
