Inooriaaseq allanngortariaqarsinnaavoq
Nunat tamalaat issittup ukiorititaanik taasaat marsip aallaqqaataani aallartissaaq. Danmarkip naalagaaffiata ataatsimiitsitaliaani siulittaasoq, sermersuarmillu ilisimatusartoq Dorthe Dahl-Jensen isumaqarpoq ukiuni kingullerni silaannaap kissatsikkaluttuinnarnerata kingunerissagaa inuunermik allanngortitsisariaqarneq.
- Kalaallit Nunaanni eqqaanilu ilisimatusarneq maanna pisariaqarluinnalersimavoq. Silaannaap allanngorartumik kiaqarnera issittumi malunniunnerpaavoq, malunniutillu nunarsuarmut tamanut siaruaatissapput. Silaannaap kissakkaluttuinnarnera sermersuup annikilliartorneranik kinguneqassaaq, nunarsuarmilu imaq qaffassaaq, uumassusilinnillu allanngortitsilluni. Pisut tamakku tamarmik inunnut uumasunut naasunullu uumaniarnerinut sunniuteqassapput, Dorthe Dahl-Jensen oqarpoq.
Danmarkimiit Kalaallit Nunaanniit savalimmiuniit ilisimatusartut 300-it ilisimatusarnissamik pilersaarut ukiuni marlunni ingerlasussaq naammasseqammerpaat. Ilisimatusartut nunanit 65-ineersut 9.000-it ilisimatusaqatigiinnermi peqataanissaat pilersaarutigineqarpoq.
