Inooqatiminik toqutsisoq eqqaamasaqanngilaq
Angut polenimiu 34-nik ukiulik inooqatiminik kalaallimik arnamik 32-nik ukiulimmik toqutsinini aalakoorpallaaqigami eqqaamanagu, ippassaq killisiuinermi oqaatigaa.
Allattoq Najaaraq Egede
Nassuernerigaluani taamaalilluni tunuartippaa, naak inissiaq toqutsiffigisani tikkuareeraluarlugu.
Arnaq toqutaasoq inissiami madrassimi nassaarineqartoq, nutaarsiassaqartitsivimmi Ritzauimi allaaserineqarpoq.
Kalaaleq arnaq 32-nik ukiulik, angummit inooqatiminit Københavnip avannaani kitaani arfininngormat toqunneqarpoq.
Toqutsineq paasineqarpoq polenimiu 34-nik ukiulik aalakooqaluni kioskimut 7-elevenimut isermat, pisiniartitsisorlu oqaluttuullugu aappani toqussimagini.
Ernini arsaarinnissutaasimasoq arnap qimataraa.
Polenimiu 34-nik ukiulik juunip ulluisa qulingiluaata tungaanut tigummigallarneqarpoq.