Issittumi Sakkutooqarfik: Innuttaasut unitseriarlugit kinaassutsimut uppernarsaataat takujumagaat - kukkuneq nassuerutigigaat
- Sakkutuut politiivi nutaat tikillutillu pissaaneqarnertik qaffassimaarutigilertarpaat. Aatsaat unitsinneqanngilanga inerteqqutaasumillu iliuuseqanngilanga.
Taama oqaluttuarpoq Bjarne Hjortborg, mittarfinnik timmisartunillu YouTube-mi kanaliminut ukiut kingulliit marluk ingerlaneranni immiussisartoq.
Taassumap Lasse Nymand Petersen Nuummi mittarfiup eqqaani aqquserngup sinaani marlunngormat ullup-qeqqanut nikorfaqatigaa, inuinnaallu biilii aappaluttut aqquserngup sinaanut unipput.
Angut 30-t sinnerlugit ukioqarpasittoq sakkutuutut uniformilik biilini issiavoq. Bjarne Hjortborg ilisarisimasaalu sunik assiliinersut; kimilu atorfeqarnersut paaserusuppaa, kinaassutsimullu uppernarsaammik takujumalluni.
Lasse Nymand Petersen Facebookikkut pisimasup kingorna pisoq allaaseraa. Allataa uissuummissutigineqapallappoq.
Angut uniformilik sakkutuut immikkoortortaqarfianni sorlerminngaanneernersoq apeqqutigineqarmat nunatsinnilu innuttaasut kinaassusaannik uppernarsaammik takujumanissaminut qanoq pisinnaatitaanersoq aperineqarami tunuarsimaarpoq.
- Uanga kinaaninnut uppernarsaasussaatitaanngilanga uannulluunniit tunngasunik oqaluttussaatitaananga. Taakkua oqartussanit sorlerninngaanneernerlutik qanorlu pisinnaatitaanertik oqaatigissallugu pisussaaffigaat, Bjarne Hjortborg oqarpoq.
Bjarne Hjortborgimulli aatsaat taama pisoqalinngilaq; arfineq-pingasoriarluni taamatut pisoqareerpoq.
Angutit uniformillit biilinik attartorlutik, ataasiarlutik sakkutuut politiivisa biilit atortagaat atorlugit marloriarlutillu pisuinnarlutik orniguttarnerat nalinginnaavoq.
- Issittumi Sakkutooqarfimmi sulisuulluni marlunngormat sivitsulaareersoq oqaluttuuppaanga.
KNR Issittumi Sakkutooqarfimmut saaffiginnippoq, kukkusoqarsimaneralu nassuerutigineqarpoq. Akissutaat tamakkiisoq ataani atuarneqarsinnaavoq.
Sakkutuut politiivisa pisinnaatitaanerat
Marc Schack Københavnip Universitetiani inatsisilerinermik lektoriuvoq.
Bjarne Hjortborgip oqaluttuaanut tunngasoq, Kalaallit Nunaanni Politiit pisinnaaffigigaat, sakkutuut politiiviunngitsoq, taanna oqaluttuarpoq.
- Innuttaasunut tunngasuni tunngaviusumik pisinnaatitaanngillat.
Sakkutuut politiivisa Illersornissaqarfimmi sulisut nakkutigisassaraat. Taamaattumillu innuttaasunut inatsisinik maleruaaqqusinissaminnut pisinnaatitaanngillat. Kalaallit Nunaanni Politiit taamatut pisinnaatitaapput.
Sakkutuut politiivisa Nuummi sakkutuunut politeeqarfik pilersinneqartoq Facebookimi quppernerminni januaarip 26-anni nalunaarutigaat. Tassanilu allapput: 'Politiit oqartussaanerat sakkutuunut taamaallaat atuuppoq.'
Issittumili Sakkutooqarfik Sakkutuullu Politiivi pissutsini aalajangersimasuni 'inunnut sakkutuujunngitsunut' immikkut pisinnaatitaaffeqalersinnaasut, Marc Schack paasissutissiivoq.
Assersuutigalugu innuttaasoq sakkutooqarfiup oqartussaaffigisaaniippat.
- Inuinnaat angallattarfigineraat, sakkutuut angallattarfigineraat imaluunniit sakkutuut angallattarfigigallagassarineraat apeqqutaaginnarpoq, tamannalu pissutigalugu malittarisassaliortoqartariaqarnersoq, Marc Schack oqarpoq.
Sakkutuulli sakkutooqarfiup avataani innuttaasunut ilaannikkut pisinnaatitaasinnaapput.
Paasissutissiissussaatitaaneq
Politiit nalinginnaasut innuttaasumut saaffiginninnerminni, Kalaallit Nunaanni Politiianeernertik uppernarsarsinnaajuartussaavaat. Tamanna politiit atisaannik atisaqarnikkut imaluunniit politiit kinaassutsimut uppernarsaatigisaannik takutitsinikkut pisinnaavoq.
Aamma innuttaasut uppernarsarneqarnissaa piumasarisinnaavaat, tassa inuk pineqartoq sakkutuujunersoq politiitut pisinnaatitaasoq, imaluunniit inuunersoq nalinginnaasoq sakkutuutut atisalersorsimasoq biilimillu attartukkamik ingerlasoq, Marc Schack oqarpoq.
- Sakkutuutut politiitut pisinnaatitaaffilerneqarsimagaanni, nalinginnaasumik talermi upernarssaatitaqartussaavoq imaluunniit ersiutaasumik takussutissaqartussaalluni, imaluunniit politiit qanittumiittut aggersarneqarsinnaasariaqarput.
Malittarisassat imaapput, kinaluunniit oqartussanit saaffigineqartoq ersarissumik paasitinneqartussaatitaavoq oqartussatut pisinnaatitaasumik saaffigineqarluni.
Aamma sakkutooqarfiup pineqarnera qularutigineqarsinnaajunnaarlugu ersarissumik nalunaaqutsersimasussaavoq.
- Sakkutooqarfiup pineqarnera qularutigineqarsinnaajunnaarlugu ersarissumik nalunaaqutsersimasussaavoq. Sakkutooqarfiup iluaniinnerluni avataanerluniluunniit nalornissutigineqartussanngilaq.
