Aasianni Pisiffik Sparilu piffissaq eqqorlugu sapaammi ullaakkut ammanngillat, pisiniartullu silataani utaqqisariaqarsimallutik. Aamma Nuummi Atertami Brugseneeraq piffissaq eqqorlugu ammanngilaq.Assi: Google Street view

Innuttaasut ullaakkorsiutinik pisinissaminnut utaqqisariaqartut

Aasianni Nuummilu innuttaasut ilaat pisiniarfiliaraluaramik pisiniarfiup ammarnissaanut sapaammi ullaakkut utaqqisariaqarsimapput, pisiniarfimmimmi ammaasussat piffissaq eqqorlugu suliartorsimanngimmata.

Pisiniarfiit ammasarfii pillugit paasissutissat takuneqarsinnaapput, ammanersulli apeqqutaalluni.

Aasianni innuttaasut ullaaq manna tamanna misigisaqarfigaat, Nuummilu Nuussuup ilaani Atertami innuttaasut tamanna aamma misigisaqarfigalugu. Innuttaasut ilaata tamanna Facebnokkikkut allaaseraa.

Aasianni pisiniarfiit marluk saavanni toqqaannartumik videoliat taassuma allaaseraa. Inuit pisiniarfiit ammarnissaat pisiniarfiit silataanni utaqqigaat allaaseraa, pisiniarfik arfineq-marlunut ammartussaq arfineq-pingasunngortoq suli ammarsimanngilaq. Sulisussat suliartorsimanngitsut oqarpoq. Aasianni innuttaasut ilaat KNR-imut tamanna uppernarsarpaat.

Nuummilu Nuussuarmi Atertami Brugseneeraq arfineq-pingasunut ammartussaq qulingiluanut suli ammarsimanngilaq.

Facebookimi allaaserisaq akunnerni marlunni atareersorlu inuit 112-it allaaserisamut oqaaseqarsimapput.

Kanngunaqaaq, ajuusaarnaqaaq, akisussaassuseqannginneruvoq. Tassa oqaaseqartut ilaasa oqaatigisaat.

Pisiffiup pisortaanerata Per Steen Larsenip pisut ajuusaarutigai.

AAMMA ATUARUK Aasaanerani sulisussaaleqisoqarmat sulisut sulipiloorput

 

- Aasianni pisiniarfiup pisortaa nalunaaqutaq arfineq-pingasunut sianerfigineqarpoq, pisiniarfiit suli ammarsimannginnerat pillugu ilisimatinneqarluni. Pisiniarfiit marluk taakku akunnerup affaata iluani ammarneqarput, Per Steen Larsen oqarpoq.

Inuit ullaakkorsiutiniaraluarlutik utaqqisariaqarnerat, pisortaanerup ajuusaarutigaa:

- Pisisartutta pisarissarsersorneqarnerat soorunami ajuusaarutigaarput, utaqqisariaqarsimanerat ajuusaarutigaarput, pisortaaneq oqarpoq.

Sulisussat ammaasussat suliartorsimannginnerat pissutaasoq, Per Steen Larsenip uppernarsarpaa.

Nuummi Atertami Brugseneeqqap piffissaq eqqorlugu ammarsimannginnera pillugu Brugsenip aqutsisui oqaaseqartinniaraluaratsigit iluatsinngilarput.

 

AAMMA ATUARUK Akissarsiatigut pitsanngorsaaneq sulisunut aalaakkaanerulersitsissaaq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat