Innuttaasut taasitinneqarnissaat piumasaraa
Erngup nukinganik ingerlatilimmik aluminiumik aatsitsiviliortoqassappat minnerpaamik innuttaasut taasitinneqartariaqarput, taama isumaqarpoq Juaaka Lyberth, piorsarsimassutsikkut illorsuarmi Taseralik-mi Sisimiuniittumi pisortaasoq.
- Inatsisartut innuttaasut apereqqaarnagit ataatsimik amerlanerussuteqalaaginnarlutik suliffeqarfissualiassat akuerissappatigit, innuttaasut ilarpassuisa isumaat sumiginnarneqassaaq, Juaaka Lyberth oqarpoq.
Juaaka Lyberthip maannangaaq eqqoriarsinnaasoraa, erngup nukissiorfiliap akiata ukiuni tulliuttuni qaffarujussuarnissaa.
- Uuliamik nioqqutissiortut kattuffiata Opec-ip nalunaarusiaa naapertorlugu nunarsuatsinni uulia ukiut 40-t 50-illu qaangiutsinnagit nungoreersimassaaq. Taamaattumik suulluunniit innaallagissiorfiit uuliaanngitsumik ingerlatillit killeqanngitsumik piumaneqalissapput. Taamaattumik nunami allamiut suliffeqarfiannut nalilissuanngortussamik tunniussineq eqqarsarnassaqaaq, Juaaka Lyberth isummersorpoq.
