Innuttaasut taasisinneqarnissaannut isumaqataanngilaq

- Nunani nunasiaasimasuni innuttaasut akornanni namminersulernissamut periarfissat piviusut tikinneqalersullu inuit ilaasa annilaangalertarnerannik nangaalertarnerannillu oqaatigineqartartoq eqqortuusimagunarpoq, taama Siumumi politikkikkut oqaaseqartartoq Lars-Emil Johansen, aluminiumillu aatsitsiviliornissaanut atatillugu Alcoap erngup nukissiorfiliornissaanut innuttaasut taasisinneqarnissaannik Juaaka Lyberthip oqaasiinut akissuteqarpoq.

Allattoq Jaaku Lyberth

marsip 13-at 2008 05:14

Juaaka Lyberth isumaqarpoq, inatsisartut taasinermik ataasiinnarmik amerlanerussuteqarlutik suliffeqarfissuarmut nalilerusujussuarmik tunniussinissaa aarlerinartoqartoq. Taamali Lars-Emil Johansen isumaqanngilaq.

- Aluminiumik aatsitsiviliorfissatut piukkunneqartuni - Nuummi, Maniitsumi Sisimiunilu - innuttaasut annertuumik paasisitsiniaaffigineqarlutillu tusarniarneqareerput. Ilimaginngilara inatsisartuni amerlanerussuteqaqqalaartoqassasoq, Inuit Aqatigiikkummi akerliunngillat, paasissutissaniguna amerlanerusunik pissarserusuinnartut, Lars-Emil Johansen oqarpoq.

Isummerfissarlu tassaanerarpaa, suliffiliassarsuaq pilersinneqassappat sumiissanersoq, aamma Namminersornerullutik Oqartussat Alcoamik suleqateqarnerat qanoq ilusilerneqassanersoq.

- Inunnik taasisitsinikkut aalajangiinissaq isumaqatiginngilara, taamaaliussagaluarutta immitsinnut pituttoratarsinnaagatta, taasisitsiuaannartariaqalersinnaallutalu, soorlu Maarmorik ammaqqissappat, Nuup Eqqaani kuultisiorfeqalissappat, uuliasiornissamillu akuersissutinik tunniussissagutta, Lars-Emil Johansen oqarpoq.

Innuttaasut taasisinneqarnissaannut isumaqataanngilaq

Aamma atuaruk