Danmarkimi innuttaasut namminneq 2018-imi siunnersuuteqarsinnaalerput, siunnersuutillu ikinnerpaamik 50.000-init atsiorneqarpata politikerit taakkuninnga suliaqarnissamut pisussaapput.

Kalaallit Nunaanni assingusumik aaqqissuussisoqarnissaa suli utaqqissunneqalaartariaqarpoq.

Pipaluk Lyngep (IA) periarfissaq tamanna upernaakkut ataatsimiinnermi ammaappaa.   Taamali aaqqissuussinerup aningaasatigut kinguneri misissorneqaqqaartariaqarnerat Inatsisartuni sisamanngornermi akuersissutigineqarpoq.

Meeqqallu atuartuarfianni atuartut angajulliit suliffimmi misilittagaqarnerunissamut periarfissaat pillugit allaaserisami matumani atuarsinnaavutit.

Suliffimmik misiliineq

Demokraatit meeqqat atuarfianni atuartunut angajullernut tunngatillugu suliffimmik misiliinermi inuusuttunut aaqqissuussamik pilersitsinissaq pillugu inatsisissatut siunnersuusiaat sisamanngornermi oqaluuserineqarpoq.

Atuartut tamatuma kingunerisaanik atuarfimmi issiaannaratik suliffeqarfeeqqami sapaatip akunneranut ataasiarlutik marloriarlutilluunniit misiliisinnaanngussapput.

- Ilinniartunut piumasaqaatinik appasinnerulersitsinissaq siunertarineqanngilaq, atuartunulli inuussutissarsiornerup tungaatigut ikaasaarfissaminnik pisariaqartitsisunut, piumassuseqarnerulersitsisumik suleriaaserlu pillugu atuartiseriaatsimik pilersitsiniaaneruvoq taamaaliornikkullu inuiaqatigiinnut iluaqutaasussamik, siunnersuusiortoq Bo Martinsen (D) oqarpoq.

Atuartut angajulliit suliffimmik misiliinissamut periarfissaqarnerisa pitsaasuunera, partiit  tunngaviusumik isumaqataaffigaat.

Arlallilli aaqqissuussap qanoq iluaqutissartaqarsinnaanera qanorlu ajoqutissartaqarsinnaanera aamma paaserusuppaat. Tamatuma saniatigut atuartut angajulliit suliffimmik sapaatit akunnerini marlunni misiliisinnaatitaareerput.

- Periarfissaq una naammappa? Imaluunniit siammasinnerunissaa pisariaqartinneqarpa? Aaqqiissutissanik allanik peqarsinnaava? Apeqqutit tamakkua ataatsimiititaliani akisussaasuni sukumiinerusumik eqqartoqqaarneqarnissaat naleqquppoq, Peter Olsen (IA) oqaluttarfimmit oqarpoq. 

Inuusuttut suliffimmik misiliinissaannut aaqqissuussaq pillugu inatsisissatut siunnersuut, siullermeerneqareersoq, piorsarsimassutsimut ataatsimiititaliamut ingerlateqqinneqareerpoq.

Innuttaasut siunnersuuteqarsinnaalernissaat naluttarfiillu

Pipaluk Lyngep (IA) innuttaasut inatsisartunut siunnersuuteqartalernissaat upernaakkut ataatsimiinnermi siunnersuutigaa.

Siunnersuut ataatsimiititaliamit suliarineqartussanngorsimavoq, siunnersuutilli qanoq aningaasartuuteqarnissaa aaqqissuussallu qanoq ilusilerneqarnissaa misissorneqaqqaassasoq isumaqatigiissutigineqarsimavoq. 

Nalerarli siunnersuutigineqartup misissorneqaqqaarnissaanik qatsussivoq. 

- Tamanna unitsinniartigu. Innuttaasut siunnersuuteqarsinnaaniassammata maani massakkut aaqqiinnarsinnaavarput, Aki-Matilda Høegh Dam (N) oqaluttarfimmiit oqarpoq. 

Siunnersuut akuerineqarpoq innuttaasullu siunnersuuteqartarnissaannut aaqqissuussap nunatsinni qanoq ilusilerneqarnissaa maanna misissorneqassaaq. 

Umiarsuarnit putsup gassiinut imermik saligutikumik nunatsinni kuutsitsisarnerup inerteqqutaalernissaa Inatsisartuni sisamanngormat aamma akuersissutigineqarpoq. 

Illoqarfinni amerlanerni naluttarfiliortoqarsinnaanera umiarsuaatillillu umiiarnikut qaqinneqarnissaannut sillimmasiinissamik pisussaatinneqartalernissaat aamma eqqartorneqarput.