Innuttaasut peqqinnikkut killiffiat sammineqassaaq
Inuttaasut peqqissuunissaanut suliniutit siunissamilu suleqatigeeriaatsit ataatsimeersuarnermi pilersaarusiorneqassapput.
Peqqinneq taamaallat innuttaasunit ataasiakkaanit peqqinnissaqarfimmillu susassarineqanngilaq. Kalaallit Nunanni peqqissuseq ilumut pitsaanerulersissagutsigu pisariaqarpoq inuiaqatigiit tamarmiusut peqqinnerulernissaq pillugu suleqatatigiinnissaat Peqqissutsimut Naalakkersuisoq Agathe Fontain oqarpoq.
Ataatsimiinnerup ulluani siullerni innuttaasut peqqinnikkut killiffiat sammineqassaaq.
Danmarkimi Nunat Immikkoortuini Siunnersuisoqatigiinnut siulittaasoq Bent Hansen Nuummiippoq Danmarkimi peqqinneq pillugu isumaqatigiissutit oqaluttuariartorlugit.
Aqagu maajip ulluisa qulingiluaanni suliitigaluni ataatsimiinnerit marluk ingerlanneqassapput. Kommuunnerujussuit sisamat borgmesteriisa akornanni suliitigaluni ataatsimmiinneq aamma kommunini, Namminersorlutillu Oqartussani allaffissornermik sulialinnut, aamma ilinniarfinni peqqinnissaqarfimmilu sulisunut suliitigaluni ataatsimiinneq.
Ataatsimiinnerit taakku marluk siunertaraat suleqatigeeriaasiusinnaasut aammalu siunissami innuttaasut peqqissusaat pillugu suliniuteqarnissap oqaloqatigiissutiginissaat.
Kalaallit Nunaanni innuttaasut peqqissuunissaat pillugu periusissat anguniagassallu pillugit suliniutip siullerpaap Inuunerittap ingerlanneqarnera ukioq manna naassaaq, suliniummillu nutaamik taarteqartinneqartussaavoq, Inuuneritta 2013-2018, Peqqissutsimut Naalakkersuisoqarfimmi maanna suliarineqartumik.
