Tunngaviusumik inatsisiliornissamut ataatsimiititaliaq: Innuttaasut peqataatinneqarnissaannik ilinniartut ujartuipput

Tunngaviusumik inatsisiliornissamut ataatsimiititaliaq suleriva aamma sooq innuttaasut peqataanngillat, ilinniartut marluk aperipput. Allatoqarfimmilli pilerrsitsiniarneq piffisssartornarsimasoq, atatsimiititaliap siulittaasua oqarpoq.

Tunngaviusumik inatsisiliornissamut ataatsimiititaliap allartinneranit maanna ukiup affaa qaangiussimalerpoq.

Kisianni susoqarpa - aamma sooruna innuttaasut peqataatinneqanngitsut, Ilisimatusarfimmi ilinniartut marluk aperipput.

Ataatsimiititaliap siulittaasua nassuiaavoq, allattoqarfiup inuttalersornera piffissartornarsimasoq. Taava atsaat suliat aallartissinnaapput.

Namminiilivinnermut naalakkersuisup Suka K. Frederiksen ataatsimiititaliami ilaasortat apriilip 26-ani, tassalu qaammatit arfineq marluk matuma siornatigut - ilisaritikkamigit qungujulaaqaaq.

 

Ataatsimiititalialli qaammatit arfineq marluk ingerlaneranni suliaannik tusagassaqagaanngitsoq, Ilisimatusarfimmi ilinniartut marluk Vivi Vold aamma Jane P. Lantz tikkuaapput.

 

- Upernaarli apriilip 26-ani pilersinneqarnikuuvoq. Tassanngaanniit qanoq suleriaaseqarnissaq suliallu sumut killinnerat avammut paasissutissiisarneq amigaatigisimavarput.

 

Jane P. Lantz Nunatta Nipaanut sisamanngornermi ullaakkut oqarpoq.

 

Innutaasut ataatsimiititaliap sulinera pillugu paasitinneqarnissartik naatsorsuutigigaat, taana isumaqarpoq.

- Sulineq aallartimmat taannalu isumalioqatigiisitaq pilersinneqarmat taava uagut innuttaasut aamma naatsorsuutigaarput, sulinerup sumut killinneranik ilisimatinneqarnissarput.

Allattoqarfik pilerseqqaarlugu

Tunngaviusumik inatsisiliornissamut ataatsimiititaliap siulittaasua, Vivian Motzfeldt nassuiaavoq, Allattoqarfimmik pilersitsiniarlutik ulapisimallutik. Johan Lund Olsen allattoqarfimmi pisortatut juulip qaammataani atorfinippoq.

AAMMA ATUARUK Lund Olsen Isumalioqatigiissitap allaffeqarfiani pisortanngortoq

 

Allattoqarfiup pilersinnissaa qaammatinik tallimaniit arfinilinnut sivisussuseqarnisssaa naatsorsuutaajuarsimasoq, Vivian Motzfeldt oqarpoq.

- Massakkullu aatsaat allaffeqarfiup tamakkiisumik inuttalersorneqarnera naammassingajalerpoq, aammalu inatsisit suut tamarmik malinneqassappata, piffissaq taama sivisutigisoq atorneqartussaalluni.

 

Vivian Motzfeldt KNR-imut sisamanngornerup ullaavani taama  oqarpoq.

Innutaasut tusarneqassasut atatsimiititaliap siulittaasua neriorsuivoq:

- Sumiiffiit sineriammi orninneqarnerisigut taavalu aamma sumiiffinni qulequttanik pingaarutilinnik oqallitsitsinikkut.

 

Ataatsimiititaliaq aappaagumut aningasanut inatsit naapertorlugu tunngaviusumik inatsimmut missingiummik ukioq 2018 naatinnagu saqqummiussisussaapput.

 

AAMMA ATUARUK Forfatningskommissionen skal naturligvis ikke have vederlag

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl