Innuttaasut peqataatinneqarnerulissasut Charlotte Ludvigsenip ukiortaami oqalugiaammini neriorsuutigaa
- Ukioq nutaaq aallartippoq, ukiorlu nutaaq takkuttoq qanoq atorusunnerlugu uagut aalajangissavarput. Inuunermi tunniussassarpassuaqarpoq pissanganartunik periarfissanillu ammaassisuusoq tigulluaraanni.
Kommuneqarfik Sermersuumi borgmester, Charlotte Ludvigsen, ukiortaami oqalugiaanni taama aallarnerpaa.
Kommuneqarfik Sermersuumi inuit suliffeqartut amerlinerisugut akileraarnerulernikkut ilaqutariit inuillu pissakinnerusut, atuarfinnut, inissialiornermut, suliniutinullu allanut aallartinneqarsimasunut taamaalilluni akileraarutit atorneqassasut borgmesteri oqalugiaammini oqarpoq.
- Suliffissaaleqisortavut aatsaat taamak oqaluttuarisaanermi ikitsigipput. Tamanna assigiinngitsut pissutigalugit nuannaarutigaarput. Arlallit suliffittaarnermikkut inuunerminni siunertaqarnerulerput, imminullu pilersorsinnaalernerup tulluussimaarnartuanik misigilersimallutik. Tamannalu uannut pingaarnerpaagunarpoq.
Inissaaleqineq sanaartornerlu
Inissaaleqineq ajornartorsiutaajuarsimasoq suli ajornartorsiutaavoq.
Nuummut nussortut amerliartornerisigut oqaluttuarisaanermi aatsaat taamak amerlatigisunik kommunit inissiaataannik 2019-imi pilersitsisoqarpoq. Kommunimmi inissiaatai nutaat 350-it pilersinneqarput.
AAMMA ATUARUK Charlotte Ludvigsen Kommuneqarfik Sermersuumi borgmesterinngortoq
Inissianik aatsaat taama amerlatigisunik pilersitsisoqaraluartoq, utaqqisutut allatsittut aamma aatsaat taama amerlatigilerput. Tassa initaartortoqarlunilu inissaaleqineq suli annertuvoq. Taakkulu malitsigisaannik sanaartornissamut sulisussat, paaqqinnittarfinnilu sulisut amigaatigineqartut ukioq nutaami ukkatarineqarnerusariaqartut taanna oqarpoq.
Mittarfiliortiternissamut tunngasut qangali pilersaarutaasut kiisami sanaartorneqarlutik aallartinneqarput. Tamannalu takornariaqarnerulernissaanut siunissami aqqutissiuussisussaavoq. Kisianni takornarianit nunarput uppisinneqassanngitsoq, borgmesteri ilaatigut oqalugiaammini oqarpoq.
Naammagisimaarinnginneq peqataatinneqarnerunissarlu
Politikikkut pisut inuiaqatigiinnit naammagisimaarneqannginnerat ilaatigut oqalugiaammi naajartornerani eqqaavaa.
AAMMA ATUARUK Akitsuutit nutaat pillugit akerliussutsimik takutitsisut: Naammaleqaaq!
Politikikkut aalajangiunneqartartunik innuttaasut tamarmik ilorrisimaartinneqarsinnaannginnerat borgmesterip oqalugiaammini nassuerutigaa, taamaammallu ukioq nutaaq aallarnerfigalugu innuttaasut tusarniaanermik peqataatinneqarnerusariaqartut taanna oqarpoq.
- Kikkut tamarmik naammagisimaarinnitsinneqarsinnaanngitsut ilisimavarput, aalajangiisoqannginneranili kikkut tamarmik tusaaniarneqarsinnaapput. Ineriartorisitsinermilu pisariaqarpoq innuttaasut qulaatiinnarlugit aaliangiisannginnissaq, taamaattumik pingaaruteqarpoq tusarniaanikkut peqataatitsisarnissaq, Charlotte Ludvigsen oqarpoq.
Borgmesterip ukiortaami oqalugiaataa ataani takuneqarsinnaavoq:
