Innuttaasut oqallinnernut peqataangippallaarput

Innuttaasut kommuninut iluarsartuussisoqartussanngormat oqallinnernut iluamik peqataasimanngillat. Tamanna Niels Thomsenip Ilisimatusarfimmi allaffissornermi bacheloritut soraarummeernerminut atatillugu allaatigisamini tamanna paasisimavaa.

- Nalinginnaasumik ullumikkut atugarput ukiut sisamakkaarlugit qinersisarneq taanna aallaavigalugu imannak paasinnittaaseqarpugut. Inuit qinertarpavut taava taakku qinikkavut sinnerluta isummersorumaarput taava taakku isummersornerat naammagigutsigu naammagissavarput, Niels Thomsen oqarpoq.

Niels Thomsen ataatsimiinnerni peqataasarnermigut malugisimavaa innuttaasut ikittunnguit peqataasartut. Assersuutigalugulu Ilulissani Kommunit iluarsartuuteqqinneqarnissaat pillugu ataatsimiisitsisoqarmat Ilulissani 5000-it missaanik inuttussusilimmi taamaallaat inuit qulit ataallugit amerlassusillit ataatsimiinnermi peqataasimasut.

Niels Thomsenip allaaserinninnermini suunuku paasisimagai, inuit ataatsimiinernut oqallinnernullu peqataasannginnerat pillugu, ima oqarpoq.

- Assigiingiinngitsut peqqutaasinnaapput. Inuit ilaasa taakkartortarpaat kulturerput aamma peqqutaaqataasinnaasoq. Qaangaanniilligooq inuit oqallinnernut annerusumik peqataaqataaneq ajormata, Niels Thomsen oqarpoq.

Niels Thomsenip ilanngullugu oqaatigaa, innuttaasut ilaat oqalliseqataanissamut peqataarusuttaraluartut kisianni inuuniarnerminni artorsaateqarnertik pissutigalugu oqalliseqataanissaminnut nukissaqartanngitsut.