Innuttaasut Nuup ilisarnaatissaanut isornartorsiuereersullu politikerit oqallisigissagaat

Nuup ilisarnaatissaanut 5 millionit koruunit aningaasartuutigineqassappat? Naagga, Per Stockholm innuttaasunut siunnersuuteqartup “Suliniut ‘Nuup ilisarnaatissaa’ unitsilli – Sermitsiaq ilisarnaatigereerparput” aperineqarami akivoq.

Kommunip illoqarfiup pingaarnersaanni eqqumiitsuliamik eqqaassutissaliornissamut pilersaarutaa pillugu, taanna siunnersuummik unitsitsiniaalluni pilersitsivoq. Taamaaliornissaminullu maanna periarfissaqalerpoq.

Innuttaasut siunnersuutaat politikerinit oqallisigineqartussanngorpoq. Nuummi innuttaasut siunnersuutaannik politikikkut suliassanngortitsiniaraanni 250-inik atsiornernik pissarsisoqaqqaartarpoq. Siunnersuutigineqartup atsiornernut killissaa qaangereersimalerpaa, taamaalilluni oqaluuserisassanut ilanngunneqarpoq. Suliniutip unitsinneqarnissaanut innuttaasut taasisut 282-iupput.

- Piffissaagallartillugu unitsinneqarnissaa uannut pingaaruteqarpoq. Suliniut millionit sisamararterutaannik akeqalereerpoq. Taamaattorli suliniutip kommunimit aalajangiunneqareersimanissaa suliarineqarlunilu naammassineqarnissaa ernummatigaara, Per Stockholm oqarpoq.

Eqqaassutissiamut Qilaat isumassarsiorfigineqartoq

Suliniut pillugu oqallinneq sakkortuvoq, tamanut ammasumik taasititsinissamut, eqqaassutissap sorliup pilersinneqarnissaanut, innuttaasut 271-iinnaat peqataanerat pissutaalluni.

Unammisitsineq illoqarfiit pingaarnersaannut periusissiamit Nuuk2035-mit aallaaveqarpoq, kommunip oqarnera naapertorlugu ilisarnaateqarnissamut kissaat pingaaruteqartutut erseqqissaatigineqarmat. Unammisunit marluk siunnersuutaat innuttaasut attaveqarfiatigut Kommuneqarfigakkut tamanut taasissutigisassanngortinneqarput.

Siunnersuut “Sermitsiap Qilaataa” illussanik titartaasartumit, Bilo Høegh Stigsenimit titartarneqartoq ajugaavoq. Ilisarnaatissamut kalaallit qilaataat isumassarsiorfiuvoq taannalu Kangillinnguit avannaanni Sermitsiamut isikkiveqarluni inissisimassaaq.

Kommunalbestyrelsip 5 millionit koruunit suliummut immikkoortippai.

Unammisitsinermut pilersaarut naapertorlugu akissarsissutigineqartussat katillugit 250.000 koruuniupput, taakkunanngalu ajugaasumut minnerpaamik 100.000 koruuniullutik.

Pingaarnersiuineq isornartorsiorneqartoq

Innuttaasulli arlallit aningaasat allatut atorneqartariaqannginnersut apeqquserpaat – assersuutigalugu inissiat nungullarsimasut imaluunniit illoqarfimmi suliassat nukinginnarnerusut. Isornartorsiuisut taasititsinermi peqataasukippallaarnera suliniutip inunnit siammasissumik taperserneqannginneranik isumaqarsoraat.

Per Stochholmip oqarnera naapertorlugu tamanna inoqatinut attaveqaatikkut ilaatigut ersarilluinnarpoq.

- Kommunimut qinikkat uillutik suliniutip uuma innuttaasunit piviusumik kissaatigineqannginnera paasissagaat neriuutigilaarpara. Akerliuninnut atsiortut periarfissanik marlunnik taasititsinermi peqataasunit amerlanerupput, taanna oqarpoq, nangillunilu:

- Peqataasoqannginneranut tamanna ersarissumik takussutissaavoq. Novembarimi taasititsisoqarnissaanut pisut qiviaraanni kommunip innuttaasut taasitikkusulluinnarpasippai.

Kommuneqarfik Sermersuumi borgmesterip ernumassuteqartoqarnera paasineqarsinnaasoq kisiannili tamatuma saniatigut Nuuk innuttaasut oqaloqatigineratigut illoqarfiullu oqaluttuarisaaneranut ataqqinninnikkut ineriartortinneqassasoq kissaatigalugu.

Innuttaasunit siunnersuutip qinikkanik maanna aalajangiiffigineqassaaq, ilisarnaatissamillu nutaanik suliaqarneq ingerlatiinnarneqassanersoq – imaluunniit suliniut unitsinneqassanersoq aalajangiiffigineqarluni.