Innuttaasut nerisassaminnik piniarsinnaasariaqarput

Timmisat pisarineqartarnerat pillugu inatsisip allanngortinniarneqarneranik tusatsiakkat, danskit politikerianut ernumatitsilerpoq. Folketingimut ilaasortaq Pernille Blach Hansen Socialdemokratimeersoq avatangiisinut ministerimut Connie Hedegaardimut arlalissuarnik allakkatigut ullumi apeqquteqarpoq.

Pernille Blach Hansenip paaserusuppaa danmarkimi avatangiiseqarfiup nunatsinni piujuaannartitsinissaq pillugu paasititsiniaanermut, Tulukkamut aningaasaliissutaasimasut danmarkimi naalakkersuisut utertinniarsinnaaneraat. Naalagaafiup Tulugaq 2,3 milliuuni koruuninik aningaasaliiffigaa, taakkulu asuliinnaq atorneqarsinnanngillat Pernille Blach Hansen oqarpoq.

Nunatsinni naalaakkersuisut kisimik ilisimagunarpaat timmisat piniarneqartarnerat pillugu inatsit allanngortinneqassanersoq, ingammik upernaakkut timmiarniartarnermut apeqqummut tunngasoq.

Ole Thorleifsenip timmisat piniarneqartarnerat pillugu nalunaarutip allannguifiginissaanut naalakkersuisunut apeqqutaa inatsisartuni akineqarumaartoq avatangiisinut naalakkersuisoq Jens Napaattooq oqarpoq. Nungusaataangitsumik piniarneq naalakkersuisunut pingaarluinnartuunerarpaa, Nunatsinnili innuttaasunut Jens Napaattooq illersuerpalaarluni oqarpoq inuttaasut taama ikitsigisut nunarujussuarmi namminneq nerisassaannarminnilluunniit piniaqqusaannginnerat, pitsaanerusumik nunatsinnit nunarsuarmioqatitsinnut paasititsiniutigineqarsinnaasariaqartoq, imaassanngimmammi innuttaasut nammineq nerisassaminnik pisaqaqqusaassanngitsut.

Avatangiisunut naalakkersuisoq Jens Napaattooq aamma oqarpoq mitit qassutinut napitittartut iliuuseqarfigeqqusaanngitsut isiginnaaginnarneqarsinnaanngitsut.