Innuttaasut isumasiorneqarput
Narsami aningaasaqarneq pillugu aalajangiinissanut innuttaasut peqataanerutinniarlugit, siullerpaamik Narsami isumasiuititsinertalimmik innuttaasunik ataatsimiisitsisoqarpoq, innuttaasullu soqutiginnilluartut, Narsap borgmesteria Kiista P Isaksen oqarpoq:
- Siunertarivarput innuttaasut peqatigalugit aningaasaqarnerup eqqartuiffiginissaa. Annermik eqqartorneqartunut ilaavoq teknikkeqarnermut tunngasut. Aamma suliffissaqarniarneq innuttaasunit ernumagineqarnerupput. Suliffissaaleqineq eqqarsaatigalugu fabrikkip ajornartorsiutaalernera kommunimut malunniutilereerpoq. Taamaattumik inunnik isumaginnittoqarfik aningaasaqarnermullu immikkoortortaqarfipput nalilersueqqusimavarput, taakkulu aningaasaqarnermut ataatsimiititaliamut sisamanngorpat maajip 11-ani saqqummiissapput. Allatut ajornassappat aningaasaqarnerput juunip 27-iani kommunalbestyrelse ataatsimeeqqilerpat eqqartoqqittariaqassavarput. Taama oqarpoq Kista P Isaksen, Narsap borgmesteria.
