Innuttaasut imminnut sorsuunnissaat pinngitsoortinniarneqarpoq

Afrikami nunat killiit sakkutooqarnikkut siuttui arlallit naalagaaffimmut Elfenbenskystenimut qanoq akuliuttoqassanersoq oqaluuseriniarlugu ippassaq katersuupput, atorfillit arlallit taama ilisimatitsinerarlugit franskit nutaarsiassaqartitsiviat nalunaarpoq.
Allattoq Elisa Isaksen
decembarip 30-at 2010 06:50

Suleqatigiiffimmi Ecowasimi, Afrikami nunanit 15-init peqataaffigineqartumi, innuttaasut imminnut sorsuutilersinnaanerat pinngitsoortinniarneqarsinnaanersoq oqaluuseraat.

Elfenbenskystenimi maanna præsidentiusumik Laurent Gbagbomik illersuisut unammillertaatalu Alessane Ouattarap, qanittukkut præsidentimik qinersisoqarmat ajugaasutut Naalagaaffiit Peqatigiinnit oqaatigineqartup, illersuisuisa akornanni eqqissiviilliornerit annertusiartuinnarput.

Elfenbenskystenimi naalakkersuinikkut eqqissiviilliorneq pissutigalugu, nunamut sanilerisamut Liberiamut qimarrattoqalerpoq. Ilaatigut Dansk Flygtningehjælp qimaasunut illersorneqarusuttunut ikiuiniarpoq. Taamaattorli ikiuiniarneq maannamut killeqaqaaq, eqqissiviilliornerillu annertusiartortillugit ikiorneqarnissamik pisariaqartitsineq sakkortusiartorpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq