Kommunit sisamaannanngorpata innuttaasut oqartussaaqataanerisa attatiinnarneqarsinnaanera qanoq pissava? KANUKOKA-p Nuummi ataatsimiisitsinerani, ualeq manna tamanna borgmesterinit kommunaldirektørinillu eqqartorneqartussanut ilaavoq.
Ippassaq oqalugiartoqarnerani innuttaasut oqartussaaqataanerat oqalugiaatigineqarpoq, kommunillu aaqqissuuteqqinneqarnissaani kommunit sisamaannangortinneqarpata, qanoq kinguneqarsinnaanera eqqartorneqassamaarpoq.
Syddansk Universitet-imi kommunit pillugit ilisimatooq Ulrik Kjær, ippassaq oqalugiarnermini oqarpoq uippallertoqartariaqanngitsoq.
- Imminut aperisoqarsinnaavoq, sooq aamma maannakkut kommunit 18-iunerini, innuttaasut oqartussaaqataanerunnginnersut. Innuttaasut oqartussaaqataanerutinneqarnissaannik oqalunneq isumassarsiaavoq pitsaasoq, Ulrik Kjær oqarpoq.