Innuttaasut akileraarutitigut qaffaaffigeqqunngilaat

Demokraatit Aleqa Hammond naapeqatigereerlugu iluarisimaarinnipput. Akerlianilli IA isumaqarpoq naalakkersuisut suliatik iluamik naammassisimanngikkaat.

Demokraatit siulittaasuat Per Berthelsen ima oqarpoq.

- Tassa aallaqqaataaniilli uagut erseqqissarparput sutigulluunniit nunatsinni akileraarutit qaffannissaat peqataaffigisinnaanagu. Aamma akitsuutit isumalluutigineqassappata ulluinnarni inuuniarnut ataasiakkaanut eqquisussat peqataaffigisinnaanagut erseqqissaatigereerlugit oqaloqatigiippugut. Per Berthelsen oqarpoq nangillunilu.

- Ukualu neqeroorutigisassatut saqqummiuppagut: Ukiuni tulliuttuni aningaasanut inatsisissaq amigartoorutitaqanngitsoq ukiunilu tulliuttuni sisamani missingersuusiorfiusuni 1 mia. koruunit tikillugit nutaatut isertitaassasut, tassa sipaarutaasinnaasut saqqummiunniarlugit oqaluttuaraarput. Per Berthelsen oqarpoq.

Inuit Ataqatigiit sinnerlugit Asii Chemnitz Narup isumaqarpoq siunnersuut amigarpallaartoq.

- Siunnersuutip saqqummiunneqaqqaarneranili IA-mit nalilerparput naammassineqanngitsutut, taamaammat aamma pissangasimavugut ullumi paasissutissanik annerusunik pissarsisinnaassanerluta, kisianni taamaattoqanngilaq. Asii Chemnitz Narup oqarpoq.

- Oqartariaqarpugut ataatsimeereerluta naalakkersuisut tungaanniit siunnersuut naammassineqanngitsutut suli isikkoqartikkatsigu. Taamaakkaluartoq oqaloqatigiinnermi akileraartarnikkut putoq matussuserneqassappat, IA-mit oqaatigivarput, akileraartarnikkut aaqqissuusseqqinnermi innuttaasut akornanni naligiinnerusumik atugaqalernissaq siunnerfiussasoq pingaartikkipput, IA-mit oqaloqatigiinnerni peqataasoq oqarpoq.

Inuit Ataqatigiit aamma 100 mio. koruuninik amigartoornissamik nalunaarneq nalaatsornertut isigaat.

- Sooq 100 mio. koruunit? Kisitsit taanna uniffiginianngilarput aamma takusinnaagatsigu suli aningaasartuutinik amerlanerusunik amigartoortoq, Asii Chemnitz Narup erseqqissaavoq.