Innuttaasut 12-14 procentii nikallugarujussuarnermik eqqorneqartarput

Kalaallit Nunaanni innuttaasut 12-14 procentiisa missaat ukiuunerani nikallugarujussuarnermik eqqarneqartartut, misissuinerit kingulliit takutippaat.
Tarnimikkut napparsimasut saaffiginnikkaangamik aporfeqartarput. (Assi pisuusaartitaq)
januaarip 05-at 2011 12:07

- Qasoqqajuaannarnermik misigisimaneq, perusussuseqannginneq, nerisassanik peqqinngitsunik nererusunneq aammalu siniinnarusunneq nikallugarujussuarnermut takussutissaapput. Qujanartumilli inuit ilaasa nikallugarujussuarnerat qullermik qaamasumik katsorsarneqarsinnaavoq. Taama oqarpoq Rigshospitalimi Tarnit pissusaannut tunngasumik immikkoortoqarfimmii nakorsaaneq, Henrik Dam, taassuma misissuineq kingulleq suliaraa suleqatigalugit nakorsaaneq, Fatuma Ali aamma nakorsaq Mogens Kegel, taakku kingulliit marluk tamarmik Nuummi Dronning Ingridip napparsimmavissuani sulisimasut.

Arnat inuusukaajunerusut nikallugarujussuarnermik eqqorneqarnerpaasartut Henrik Damip oqaatigaa.

Ukiuunerani nikallugarujussuartarnerit sumiiffinnut attuumassuteqarluarpoq, taamaattoqartarluni taarsisalernarani nillertinneranilu. Ukiuunerani nikallugarujussuartarneq nunarsuatta qiterpasissuani, tassa Ækvatorimi atungaanngilaq, avannarpariartortillunili tamassuma atungaanera ersarissiartortarluni.

- Misissuinitsinni aamma ersarissumik takusinnaavarput Kalaallit Nunaata kujataani aamma avannaani assigiinngissuseqartoq. Kujavariartornitsinni ukiuunerani nikallugarujussuarnerit inuit akornanni ikiliartorput. Tassami assersuutigalugu Upernavimmi ukiumi kaperlattarpoq, Nuummili taamaagani, Henrik Dam oqarpoq.

Qujanartumilli ukiuunerani nikallugarujussuarneq atortut suunngitsunnguit atorlugit aaqqinneqarsinnaavoq, tassa qulleq qaamasoq atorlugu aaqqinneqarsinnaammat.

- Inuit 50-niit 75 procentit angullugit qulleq qaamasoq iluaqutigisinnaavaat, allanik nikallugarujussuarnernit nappaateqanngikkunik, nakorsaaneq oqarpoq.

Qullermik qaamasumik katsorsarneq piffissaq sivikitsunnguaq atorlugu aaqqinneqarsinnaasoq aamma misissuinermi erserpoq.

- Nikallugarujussuartunik katsorsaanitsinni takusinnaasimagaluarparput, ikiorsiissutigisartakkagut aatsaat qaammaterpassuit qanngiunnerini takussutissaqartilersartut. Qaamanerli atorlugu katsorsaasaleratta takusinnaavarput sapaatip akunnera ataasiinnaq qaangiukkaagat katsorsakkagut siuariatulersimasut. Qullermik katsorsaaneq sapaatip akunneri marluk atorlugit naammattoq misissuinitsinni aamma paasivarput, Henrik Dam oqarpoq.

- Katsorsakkatta ilaasa kingusinnerusukkut qulleq atorniartarpaat, nappaammik utertoorsimagaagamik.

Nuummi napparsimmavimmi aamma sinerissami napparsimmavinni allani qulleq qaamasoq atorniarneqarsinnaavoq, angerlaallugu taanna iluaqutigineqarsinnaalluni.