Peqqissutsimut naalakkersuisoq, Martha Abelsen, coronavirusi pillugu tusagassiortunik arfininngornermi katersortitsivoq Assi: KNR

Innuttaasut 100-t missaanniittut coronavirusi pillugu saaffiginnittarfimmut saaffiginnereertut

Coronavirusip tunillaassuunnginnissaa tamanit akisussaaffigineqartariaqartoq peqqissutsimut naalakkersuisoq oqarpoq.

Naalakkersuisut coronavirusi pillugu saaffiginnittarfimmik pilersitsinerannit ulloq ataaseq qaangiuttoq inuttaasut 100-t missaanniittut oqarasuaatitigut e-mailikkullu saaffiginnereerput.

Peqqissutsimut naalakkersuisoq, Siumumeersoq Martha Abelsen, tusagassiortunik arfininngornermi katersuutsitsinermi taama paasissutissiivoq.

- Amerlanerit tassuunga saaffiginnittut angalasuupput, angalallutik nunatsinnukartut, imaluunniit nunani allaniittut. Taakku annerusumik qaqugukkut angerlarsinnaanerlutik maleruagassallu qanoq innersut paasiniaapput, Martha Abelsen oqarpoq.

Ersiutit suuppat?

Coronavirusimik tunillatsissimasut ukuninnga ersiuteqarsimapput:

  • Panertumik quersorneq
  • Kissarneqarneq
  • Anersaartorniarnikkut ajornartorsiuteqarneq
     

Nakorsaaneqarfiup nittartagaatigut annerusumik atuagaqarit

AAMMA ATUARUK Nunatta nakorsaanera: Atuartut nunatsinnut angerlartut virusimik tunillatsissimanermut ersiuteqarnerlutik maluginiartariaqarpaat

Sumiiffinnit immikkut aarlerinartorsiorfiusunit nunatsinnut angerlartut sapaatit akunnerini marlunni angerlarsimaqqaarnissaat kaammattuutigineqarpoq. Angerlarsimaqqaarnissarli peqqinnissaqarfimmi sulisunut utoqqarnillu sullissisunut piumasaqaataavoq.

Nunat immikkut aarlerinartorsiorfiusut tassaapput, Kina, Iran, Italia, Østrigip immikkoortortaa Tyrol Spaniallu immikkoortortaa Madrid. Nunatta nakorsaaneqarfiata nittartagaani tamanna atuarneqarsinnaavoq.

Nunanit immikkut aarlerinartorsiorfiunngitsunit tunillaassorfiusuniilli nunatsinnut angerlartut tunillatsissimanermut ersiuteqarunik inunnit allanit immikkoornissaat oqartussat kaammattuutigaat.


Tamanit akisussaaffigineqartariaqartoq

Napparsimalertut coronavirusimilluunniit tunillatsissimanermut ersiuteqartut peqqissutsimut oqartussanut oqarasuaatitigut attaveqassapput.

Nunatsinnut angerlartut mattusimagallarnissamut kaammattuummut ataqqinninnissaat Martha Abelsenip kissaatigaa.

- Akisussaaffik tamanit tiguneqartariaqarmat kaammattuutigeqqissavarput, avataaninngaanniit nunatsinnut tikikkaanni ulluni 14-ini minnerpaamik mattusigallartarnissaq ullumikkut ataqqineqarpallaanngitsoq ataqqineqarnerusariaqartoq. Kissarneqanngilanga napparsimanngilangamik oqapallattarneq annertuallaaqimmat. Nalunatigulu piffissami aggersumi angerlakaasut amerlasoorujussuussasut, Martha Abelsen oqarpoq.

AAMMA ATUARUK Overblik: Status på coronavirus

Coronavirusi pillugu oqarasuaatitigut saaffiginnittarfiup normua tassaavoq 80 11 00, ullullu tamaasa ullaakkut nalunaaqutaq arfineq-pingasunit ualikkut sisamat tungaanut saaffigineqarsinnaalluni.

Aamma e-mailikkut corona@nanoq.gl-kkut saaffiginnittoqarsinnaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat