Innuttaasup saaffiginnissuteqarneratigut ilaqutariit ajunaartut politiinit nassaarineqartut

Ilaqutariit tassaapput, angut 33-nik ukiulik, arnaq 31-nik ukiulik, qitornaallu aappaa avillugu ukiulik. Tamarmik ajunaarput.

- Alianarpoq, Mads Lynge, Aasiaat politiivini pisortaq KNR-imut taama oqarpoq.

Innuttaasut ilaat umiatsiamik, ilaqutariit novembarip 28-ani periarfeerunneqartut umiatsiaata assinganik, takusaqarsimalluni politiinut saaffiginnissuteqarpoq.

AAMMA ATUARUK Ilaaqutariinnik ujaasineq taamatippoq

Umiatsiarlu Aasiaat kujataata kangiani Amitsuarsuup kangerluata qinnguani takuneqartoq politiit sapaatiummat alakkarpaat. Ilaqutariillu umiatsiap eqqaaniittut aamma nassaarivaat.

Toqqutigisaat suli paasineqanngilaq, toqusunilli misissuineq ullumikkut kingusinnerusukkut pissaaq.

AAMMA ATUARUK Ujaarineqartut timaat toqungasut politiit nassaarigaat

Ilaqutariit tikinngitsoornerat novembarimi nalunaarutigineqarmat, politiit Issittumi Sakkutooqarfik peqatigalugu ulluni arfinilinni ujaasipput. Qulimiguulinnik, umiarsuarnik umiatsiaaqqanilli aamma ujaaseqataasoqarpoq.

- Ujaasinerit peqataaffigisama annersaraat, Mads Lynge oqarpoq.

- Soormiuna ilaqutariit aatsaat nassaarineqartut?

- Ujaasineq ilungersunartupilussuuvoq. Nittaappoq, qulimiguulimmiillu takuneqarsinnaasimanngillat. Ujaasiffigineqartup anertuupilussuusup avammut killingani nassaarineqarput. Nunaqarfiit kujallersaannit Qeqertarsuup tungaanut ujaasisoqarpoq, Mads Lynge.

Taanna naapertorlugu ajunaartut ajunaalernermi ikumatitassanik radioaqqamillu nassaarfigineqanngillat.

Ilaqutaasut kalerrinneqareerput.