Innuttaasunik misissuinissaq kisiat akueraat
Folketingimut ilaasortaq Juliane Henningsen taama oqarpoq, peqqinnissamut ministerip Jakob Axel Jensenip misissuinissap ingerlanneqarsinnaanera ippassaq nalunaarutigimmagu, piumanerulluguli taavani uumasut misissuiffigineqassasut.
- Soorunalimi nuannaajallaatigaara innuttaasut Qaanaami najugallit misissuiffiginiarneqalermata, isumaqarpungalu iluaqutaassagaluartoq pisuussutit uumassusillit tamarmik uagut nunatsinni pinngitsoorsinnaanngilluinnakkatta aamma misissuiffigineqarnissaat, innuttaasummi periarfissaqartariaqarput pisarisartakkamik pasinaateqarsinnaasut misissugassanngorlugit tunniuttarnissaannut, taamaalilluni innuttaasut akornanni pisariaqanngitsumik toqqissisimannginneq pinngitsoorneqarsinnaammat, taamatummi toqqissisimannginneq manna tikillugu takusimavarput, Juliane Henningsen oqarpoq.
Peqatigiiffiup Hingitaq 53-ip siulittaasuata Uusaqqaq Qujaakitsup aamma uumasut misissuiffigineqarnissaat piumasarigaluarpaa. Pingaartumik uumasut napparsimasut piniartut ilaanni tikiunneqartartut.
- Siunissarput maani avannaani annilaanngatigaarput, tassami puisit napparsimasorujussuit takusarakkit, ulloq mannalu tikillugu puisit marluk napparsimasorujussuit pisaraakka, naak Thulemi mittarfeqarfimmit ungasikkaluaqisut. Taamaattut pisarigaangatsigik nalusarparput kikkunnut tunniutissanerlugit, tamannalu pillugu qinnuigaakka misissueriaatsimik allatut ittumik suliniuteqaleqqullugit, taama oqarpoq Uusaqqaq Qujaukitsoq.
Peqatigiiffiup Hingitaq 53-ip taavani misissuisarfiliortoqarnissaa piumasarigaluarpaa. Tamatumunngalu peqqinnissamut ministeri angeraniluunniit naaggaarani, oqarlunili isummertoqalersinnagu tigussaanerusumik siunnesuut pissarsiarineqaqqaartariaqartoq.
