Innuttaasunik isumasiuineq nalorninartoqartoq

Qinersisartut oqarasuaatikkuinnaq internetsikkuinnarlu isumasiorneqartillugit inerneri nalorninartoqarput, innuttaasut 44 procentiinnai oqarasuaateqarmata, 30 procentiilu ataallugit internetsimut attaveqarlutik. Isumasiuinermik misilittagalik Kasper Vilstrup taama naliliivoq.

Isumasiuisarfiup Isumap Inatsisartunut qinersinissamut atatillugu qinersisartunik isumasiuisaqattaarpoq, oqarasuaatit internetsilu aqqutigalugit. Kisianni taakkuinnaat atorlugit isumasiuineq nalorninartortaqartoq, isumasiuinermik misilittagallip Kasper Vilstrup-ip nalilerpaa.

Misissuisarfipput 1970-mi aallartikkatsigu Danmarkimi najugallit 40 procentiisa missaat oqarasuaateqarput. Taamanilu misissorparput, qanoq iliorluta oqarasuaateqanngitsut isumaat missiliorsinnaanerlugu. Piuminaatsuinnaanngilaq, kisianni iluatsipparput, periaaserlu maannanut suli atorneqarsinnaavoq.

Eqqarsaatigiuartariaqarpoq, inuit oqarasuaateqannginneri, peqataarusunnginneri allalluunnit pissutigalugit aperinngitsuukkat, apersukkanit allaanerusumik akissuteqariataarsinnaammata. Tamannalu eqqaamajuartariaqarpoq, isumasiuinermi paasisat nassuiarnialeraanni, Kasper Vilstrup oqarpoq.

Naatsorsueqqissaartarfiup 2004-imut ukiumoortumik kisitsisitigut pasissutississutaani saqqummeqqammersumi takuneqarsinnaavoq, nunatsinni oqarasuaammik atuisut 24.886-nik amerlassuseqartut, tassa innuttaasut 100-ppata 44-it oqarasuaateqarsimassallutik. 2004-p naanerani internetsimut attaveqarsinnaasut 15.652-iupput, tassalu innuttaasut pingajorarterutaat ataallugit.