Innuttaasunik ataatsimiisitsisarnerit soqutigineqarluaqaat
Sapaatip akunnerani kingullermi Nuummi Maniitsumilu paasissutissiilluni ataatsimiititsinernut inuit 200-ngajaat takkussimapput, tassa illoqarfinni taakkunani qineqqusaartoqartillugu takkuttartunit amerlanerusut.
Paasissutissiilluni ataatsimiititsinerni maanna Sisimiut tullinnguuppoq, unnugulu nalunaaqutaq arfineq-marlunut ataatsimiititsinissami, Nuummi Maniitsumilu misilittakkat tunngavigalugit ataatsimiinnissaq Minihalimut nuunneqarpoq, taamaalilluni soqutiginnittut tamarmik inissaqarsinnaaqqullugit.
Ataatsimiinnermi aallartitat Greenland Development-imeersut, Alcoa-meersut aamma Namminersornerullutik Oqartussat pilersaarusiornermut atatillugu avatangiisinik nalilersuinermik suleqatigiissitaliaat, misissuinerni killiffiit pillugit nassuiaateqassapput.
Avatangiisinut Pinngortitamullu pisortaqarfimmi allaffeqarfimmi pisortaq, Klaus Georg Hansen oqaluttuarpoq, Nuummi Maniitsumilu sapaatip akunnerani kingullermi ataatsimiigiartut illoqarfigisamik aluminiumik aatsitsiviliorfigineqarnissaa assut soqutigigaat tamatumunngalu atatillugu illoqarfitsik toqqarneqassaguni qanoq iliuuseqassanersoq paaserullugu.
Peqatigitillugu avatangiisinut sunniutigisinnaasai soqutigineqaqaat, matumanilu aatsitsiviup mingutsitsinerpaartai nunatsinni pissanngimmata oqiliallaatigineqarpoq.
- Inuilli tamatumunnga atatillugu mingutsitsinerpaaffiusussat nunarsuatsinni sumi pinissaat paaserusuppaat, tassa mingutsitsinermit kikkut eqqugaassanersut paaserusunneqarluni, Klaus Georg Hansen naggasiivoq.
