Assi: Rebecca Gustafson - Visit Greenland

Ilisimatusartoq: Innuttaasunik ataatsimiisitsinerit atorsinnaanngillat

Innuttaasunik ataatsimiisitsinerit Nunatsinni takornartarineqanngillat. Imigassaq, namminersorneq aatsitassat - ataatsimiinnerpassuit. Innuttaasulli ataatsimiisinneqarnerini inuusuttut takussaarpiartanngillat.

Ph.d.-liortup Anna-Sofie Skjervedalip Ilisimatusarfimmeersup aatsitassarsiortut innuttaasunik akuutitsinerat misissorsimavaa.

Taanna isumaqarpoq inuusuttut oqalliseqataalersinniarlugit nutaaliortoqartariaqartoq.

Ilisimatusartup Anna-Sofie Skjervedalip Nunatta Avannaani aatsitassarsiortut innuttaasunik ataatsimiisitsineri arlallit malinnaaffigisimavai. Taakkunanilu utikattumik pisoqartarpoq.

- Inuusuttunik najuuttoqanngingajaavittarami.

AAMMA ATUARUK Kannguttaatsuliortarneq pillugu innuttaasut ataatsimiittut

Ilisimatusartup oqaluttuaraa ataatsimiisitsinerit innuttaasut akulerutsinneqarniarneriniit paasititsiniaanertut ingerlanneqarnerusartut.

- Tamatumuuna takusinnaannguatsiarparput innuttaasunik akulerutitsiniarneq iluaqutaanngitsoq.

Innuttaasut akulerutsinneqarnissaannut taarsiullugu amerlasuutigut innuttaasunik ataatsimiisitsinernut sangutinneqartarput, oqartussaasut suliffeqarfilluunniit innuttaasunik qaaqqusisuusarput paasissutissiillutillu,  massa innuttaasut akulerutsinneqarnissaat ukkatarisussaagaluarlugu taamaalillugillu akulerutsillugit, Anna-Sofie Skjervedal oqarpoq.

AAMMA ATUARUK Aatsitassarsioqatigiit innuttaasunik ataatsimiisitsiniartut

Taamaattumik eqqarsariaaseq allanngortittariaqarpoq nutaaliorlunilu, ullumikkullu nipit tusarneqartanngitsut pissarsiaralugit, taanna isumaqarpoq.

- Kaffisoqatigiilluni ataatsimiinnerit iluatsilluartutut misilittagaqarfigineqarput, soorlu suleqatigiiaanik pilersitsilluni;  innuttaasummi attaveqatigiittarfii atorneqaraluttuinnarput.

Innuttaasut attaveqatigiittarfiat facebook Anna-Sofie Skjervedalip misissuiffigisimavaa. Tassuunami inuusuttut attavigineqarsinnaapput.

- Inuusuttut amerlaqisut ullutsinni facebook atugaraat. Ikinngutitik ilaquttatillu ungasissumiittut maani Kalaallit Nunaanni attaveqarfigisarpaat.

AAMMA ATUARUK Innuttaasut peqataatinneqarnissaannik ilinniartut ujartuipput

Ilisimatusaatigalugu suliaminut Skjervedalip inuusuttut facebook aqqutigalugu peqataatissimavai. Tassani facebookip naliginnaasumik atortarneratut inuusuttut assit oqaasertallit akisarsimavaat, taannalu iluatsilluarsimavoq.

- Inuusuttut apersorlugit soqutigisaallu iternga tikillugu paasillugit, taava nuannaartorujussuanngortarput, tusarneqarusuttorujussuuppummi.

Ilisimatusartoq nassuiaavoq facebook tassaanngitsoq iluarsiissutissaasoq. Innuttaasut itisuumik oqaloqatiginissaat allatut periaaseqarluni ingerlattariaqarpoq, facebookili attavittaartorfiusinnaasoq, taanna oqarpoq.

AAMMA ATUARUK Múte Qeqertarsuarmi innuttaasunik ataatsimiititsilersoq

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl