Innuttaasunik akuutitsinissamik inassutit Naalakkersuisunut tunniunneqartut
Innuttaasut peqataatinneqarnerat inatsinik tunngavissaqartinneqalissasoq, nunat assigiinngitsut akornanni isumaqatigiissutit malinneqassapput naammagittaalliorfissallu pitsanngorsarneqarlutik.
Kalaallit Nunaanni NGO't suleqatigiiffiat oktoberimi 2013-imi pilersinneqartoq, makkunannga ilaasortaaffigineqarpoq: Transparency International Greenland, ICC, WWF, Avataq, KNAPK, Earth Charter Greenland, Peqatigiiffik 16. august aamma Nuup Kangerluata Ikinngutai. Kattuffiup siunertaraa aatsitassarsiortoqartillugu innuttaasut akuliutsinneqartarnissaat.
Suleqatigiiaartarnikkut NGO't unnersuussutitik allaganngorlugit marsip 20anni Naalakkersuisunut tunniuppaat.
Innuttaasut tamarmik aalajangigassanik sunnerneqarsinnaasut oqaaseqarnissamut periarfissinneqassapput. Taamaattumik NGO't suleqatigiiffiata unnersuussutigaat, qaammarsaaneq tamanut apuussinnaasoq, arlaannaannulluunniit attuumassuteqanngitsoq uppernartuussasorlu ICC'p siulittaasua Aqqaluk Lynge oqarpoq. Taassuma aalajangiinernut innuttaasut peqataatinneqarnerunissaat sivisuumik suliniutigisimavaa.
Transparency International Greenlandip siulittaasuata Anders Meilvangip erseqqissarpaa, Kalaallit Nunaata nunat assigiinngitsut akornanni isumaqatigiissutit eqqortittariaqarai, ingammillu Aarhusimi isumaqatigiissut, Naalagaaffiit Peqatigiillu ileqqorlunnikkut iluanaarniarnissaq pillugu isumaqatigiissutaat.
- Pingaaruteqarpoq isumaqatigiissutit piginnaatitsissutaasa kalaallit inatsisaannut ilanngunneqarnissaat malinneqarlutillu, taanna oqarsimavoq.
- Innuttaasut piginnaatitaaffeqalerpata, allaffissornikkut ingerlatsisunut naammagittaalliorsinnaaneq periarfissaalissaaq. Aalajangiissuulluinnarporli oqartussat suliamik suliarinnillutillu aalajangiisut taavalu maalaartarfiusup akornisa matoqalluinnarnissaat, Anders Meilvang erseqqissaavoq.
