Innuttaasoq Jonathan pillugu: Sunniutilerujussuusimavoq

Nuummi innuttaasut aqqusinermi naapitatta Jonathan Motzfeldtip toqunera killitsissutigaat.
oktobarip 28-at 2010 17:30

- Tassa sooruna Juuntaaq pingaaruteqarpoq. Namminersorneruleratta siuttuuffiginikuuaatigut sivisoorujussuarmik. Toqummat attortinnarqarpoq. Inuusuttuunera tamaat siuttuunikuummat ataqqinartumik ataqqillugu eqqaarusuppara, Qulutaq Kristiansen oqarpoq.

Allallu aamma Jonathan Motzfeldt meeraanerminiilli Nunatta siuttuatut qaatuussarivaa:

- Aatsaaqqinnaaruna Namminersorlutik Oqartussat erfalasut takugiga qiteqqusimasoq, aatsaallu paasillugu toqusimavoq. Tupannarpoq, Marianne Malakiassen oqarpoq, nangillunilu:

- Isumaqarpunga sunniutilerujussuusoq, politikkikkummi sammineqartut malinnaaffigisartorujussuungakkit. Qaatuppungali siuttuusoq. Isumaqarpunga Kalaallit Nunaata ineriartorneranut sunniutilerujussuusoq. Aamma isumaqarpunga pikkorissimaqisoq, suliaalu eqqarsaatigalugit annertoorujussuupput. Sivisuumik siuttunut ilaasarnermini qinigaasarnerminilu siunniuterpassuaqarsimagami siuttuusimavoq sivisoorujussuarmik, Marianne Malakiassen oqarpoq.

Michael Sivertsenip Jonathan Motzfeldt toqusoq tusaramiuk tupassimavoq:

- Jonathan Motzfeldt politikikkut maligassiuisuuvoq. Inuusuttunut tunniussaqarnikuuvoq. Namminersornerulernitsinnut sulisimaneranut aqutsimaneranullu qujaffigisassarivarput, Michael Sivertsen oqarpoq.