Innuttaasoq: Aleqa Hammond Nikku Olsen pillugu oqaaseqartariaqalerpoq

-Naalakkersuisunut ilaasortat ataatsimut isigalugit oqaaseqanngippallaarput. Nikku Olsenimut tunngatillugu pisut pillugit nipangersimaannarpallaaqaat, oqallinnermullu akuliuttariaqarlutik. Pingaartumik Naalakkersuisut siulittaasuat Aleqa Hammond, Naalakkersuisunut akisussaasuusoq, akuliuttariaqarpoq, Ida Abelsen, Sisimiuneersoq, oqarpoq.

Aleqa Hammond, tusagassiutinut nalunaarummik ullumi ullaap tungaani avammut nassiussaqarpoq. Siumumiit Inatsisartuni matoqqasumik ataatsimiissimanerup inernera ataqqivarput aammalu ilaasortat ataasiakkaat pillugit oqaaseqarnissarput pissusissamisoortutut soorunami isiginatigu, Aleqa Hammond ilaatigut allappoq.

Tamanna ikkappallaaq, Ida Abelsen isumaqarpoq:

-Sulianut ataasiakkaanut akuliutinnginnissamik oqariartuuteqarneq ajornanngippallaaqaaq. Isummani matumani annittariaqarpaa. Qanoq inissisimava? Qanoq isumaqarpa? Ida Abelsen, inunnik isumaginninnermi siunnersorti, aperivoq.

Pineqaatissinneqarsimannginnermik upernarsaammik taanna atorfimminut atatillugu tunniussisariaqarpoq. Inatsisartunut kommuninullu qinigassanngortinniartut uppernarsaammik taamaattumik tunniussaqarsinnaasuuppata, Nikku Olsenimut suliatut ittut pinngitsoortinneqarsinnaassagaluartut oqarpoq:

-Pineqaatissinneqarsimannginnermik uppernarsaammik partiit piumasaqarsinnaatitaasariaqarput, suliat Partii Inuit siulittaasuanut assingusut taamaaliornikkut pinngitsoortinneqarsinnaaniassammata, Ida Abelsen oqarpoq.

Taanna Inuit Ataqatigiit sinnerlugit Qeqqata Kommuniata kommunalbestyrelsianut qinigassanngortikkaluarpoq, qinigaananili.