Innutaasutut pisinnaatitaaneq oqinneruleqqissaaq
Danmarkip naalagaaffiani innuttaasutut pisinnaatitaaffeqalersinnaanermut piumasaqaatinik sukaterisimaneq, konservativinit peqqissimissutigineqarpoq, immikkullu ittumik pisariaqartitsisunut inatsimmi aaqqiinissaq, Danmarkimi konservativinit Dansk folkepartiimillu piareersimaffigineqalerput.
Qaammatit sisamat matuma siorna naalagaaffimmi innuttaasutut pisinnaatitaaffeqalersinnaanermut inatsit sukaterneqarpoq, taamanikkullu inuit pisinnaatitaaffiinik suliaqartartut nakorsarpassuillu inatsimmik sukaterineq akerlilerpaat.
Inuit naalliutsinneqartarsimasut, nappaatigilersarpaat aniguereernerup kingorna stresserneq, qallunaatut taaguutilik posttraumatisk stresssyndrom. Inuit taamaattut oqaatsinik ilinniarsinnaanerat killeqalertarpoq.
- Danmarkimi naalagaaffimmi innuttaasutut pisinnaatitaaffeqalersinnaaneq inuunnut taamatut napparsimalersimasunut ajornakusuulersarpoq, oqaatsinik ilinniarsinnaannginneq pissutaalluni. Taamaammat anguniarsimavara, inatsisinik kipparippallaartunik peqarnitta allanngortinneqarnissaanik suliniuteqarnissaq, taama oqarpoq folketingimi Naalagaaffimmi innuttaasutut pisinnaatitaaffeqalersinnaanermut ataatsimiisitaliap siulittaasua Allan Niebuhr.
Dansk folkepartii konservativillu maannakkut inatsisinik iluarsaasseqqisinnaanermik oqariartuuteqarput. Dansk folkepartiip oqaaseqartartua Søren Krarup oqarpoq, naalliutsinneqartarsimasut eqqarsaatiginerullugit inatsisinik sukangavallaartunik sakkukillisaanissamut ammallutik, erseqqissaatigaali, immikkut ittumik akuersisoqartussaatillugu uppernarsaatinik pitsaasunik peqartarnissaq pisariaqartassasoq.
