Inngilit savanik paarsisunut kalaallinut tussiartut

Ukioq manna juullimut nipitittagaq, inuusuttumit 37-nik ukiulimmit sananeqarpoq.Titartaasup, Rasmus Berthelsenip tussiusiaa, ”Guuterput” isumassarsiorfigisimavaa.

Juullillu nipitittagaata kulturikkut nersornaasiuttagaaerinarsoqatigiinnut tunniunneqarpoq.

Ukioq manna juullip nipitittagaanik, Danmarkimi nunatsinnilu unammisitsisoqarpoq.

Ajugaasutut toqqarneqarpoq, Danmarkimi najugalik, Nikolaj Andersen Olsvig, ilinniartitsisoq, 1967-imi Sisimiuni inunngorsimasoq.

Nikolaj Andersen Olsvigip, juullip nipitittagaliaminut isumassarsiorfigisimasani, Rasmus Berthelsenip tussiusiaa, ”Guuterput”, imalu oqaatigaa:

- Soorlu tunuatungitsinni tusaasinnaasatsitut, NIPI-kkut Guuterput tussiarpaat. Tussiut taanna tusaraangakku attortittaqaanga. Tassani pissutaavoq, itisuujugami oqaluttuartuullunilu Guuti aqqutigalugu, annannissamut periarfissamik.

Tussiutaallunilu kalaallit kulturianiilluinnartoq. Tamanna pissutaagunarpoq taama sakkortutigisumik attortinnartarmat.

Titartagaq akrylimik qalipagaavoq.

Inngilit savanik paarsisunut tussiartut. Kalaalerpaluttuutinniarlugu, savanik paarsisut kalaaliutippakka. Savanik paarsisut taakku inngilinik tussiartunik tusarnaarput.

Tassuuna takutinniarpara juullip oqariartuutaa tipaatsunnartoq nunarsuarmiunut tamanut oqariartuutaagaluartoq, aamma kalaallit nunaanni atuummat.

Juullip nipitittagaata siulittaasua, Helga Maqe Nielsen, toqqagartik ima oqaluttuaraa:

- Qalipaatai nuannersuupput. Inngilit ullorissatut isikkoqangajattuupput. Qalipaatillu sungaartut orangiat tungujortut atoramigit, nunami qalipaatinut uteqqilluni.

Juullip nipitittagaata kulturikkut nersornaasiuttagaa, Tasiilami erinarsoqatigiinnut Inngeratsilikkunnut tunniunneqarpoq.

Tamaasa tikisinnissaannut akissaqannginneq pissutigalugu, erinasoqatigiinnit sisamat kisimik tikissimasut, Helga Maqe Nielsenip aamma oqaatigaa.