Inngili qernertoq ukiormanna ammaqqissagunarpoq
Piiaanissaq ukiormanna aallartinneqareersinnaasutut naatsorsuutigineqarpoq, sulisullu 110-t missaanniittut sulisorineqarsinnaassallutik.
Suliffeqarfiup imminut akilersinnaaneranik misissuineq, ujarassiuut naliliinerat inuiaqatigiinnut, avatangiisinut nunallu ataqatigiinnermut attaveqarfii pillugit
misissuinernut nalilersuinerit, suliffeqarfiup piiaanissamut qinnuteqaammini ilanngullugit nassiuppai.
Suliffeqarfiup piiaanissap avatangiisinut sunniutigisinnaasai nalilersorsimavai.
Aatsitassanut Ikummatissanullu Pisortaqarfiup qaammatini tulliuttuni paasissutissat misissoqqissaassavai, tamatumuuna suliniutip avatangiisinut inuiaqatigiinnullu sunniutissaasa qulaajarneqarnissaat qulakkeerniarneqarmat, Aatsitassanut Ikummatissanullu pisortaqarfik tusagassiuutinut nalunaarummini allappoq.
Inngili Qernertoq 1990-imi ukiuni 17-ini aatsitassarsiorfioreerluni matuneqarpoq. Aatsitassarsiorfik ammaqqinniarneqarpoq aatsitassaqarfinnik nutaanik nassaartoqarnerata kingornagut aamma aqerlussap zinkillu akiisa ukiuni kingullerni qaffannerisigut.
