Inneruulat erinarpaalussuarnik atuilerput
Rockimik nipilersortartut Inneruulat ukiunik 35-nngortorsiorput nalliuttorsiornermullu atatillugu tallimanngornermi unnukkut Nuummi kulturikkut illorsuarmi Katuami tusarnaartitsiniarlutik. Inneruulat nuannarinnittaat piffissami kingullermi angerlarsimaffimminni nipilersuutit atorlugit kissassilereerput unnugu Katuami sakkortussaatit Marshall-it ikinneqannginneranni.
Angut Classen aamma Kâlêrak’ Reimer KNR-TVp aallakaatitaani ”Tamassa”-mi tallimanngornermi unnukkut pulaartuupput, tassani ilaatigut oqaluttuaralugu angutit inuusuttut qangalaanngulersoq Aasianni nipilersoqatigiittarniarlutik aalajangernerat. Ataqatigiinneq taanna attartuujusoq paasinarsivoq maanna ukiut qulikkaat sisamassaat ingerlasoq tusarnaartiminnik nuannisartitsisarmata.
Maannalu tassa aliannaarnissamut piffissanngorsimavoq taamanikkut Inneruulat Qullissani immiussaat siullerniit nuussuarmi ”Qangattarsa qangattarsartigut”-mi immiussat ilanngullugit. Taassuma kingorna Inneruulat aamma saqqummersippaat ”Inneruulatut naajorarpugut”, ”Inuummartoqaat” aamma ”Qaartartut”.
Inneruulat erinarsuusiaasa ilarpaalui politikkimut tunngasunik taallaqarput aammalu ilaqarlutik kulturitsinnut tunngassuteqartunik.
- Imaanngikkaluarpoq uagut nammineq isummagut kisiisa taalliarisarivut. Aamma inunnit allanit tusakkavut aallaavigalugit taalliorsinnaasarpugut, Angut Classen oqaluttuarpoq.
Taanna unnugu ”Tamassa”-mi Siiva Olsenimit pulaartigineqassaaq Inneruulat aallarteqqaarnerannit peqataasartoq Kâlêrak´Reimer aamma pulaartooqatigalugu. Taakku ilaatigut oqaluttuaraat nipilersoqatigiit atiat unnia naasumut inneruulamut tunngatinneqanngitsoq.
Katuaq KNR-imut ullup qeqqa sioqqullugu nalunaarpoq billetit 500-ngajaat maanna tunineqareersut sulilugooq 500-nut inissaqarpoq.
