Nuummi meeqqat ornittagaat, Inneruulaq/Mælkebøtten, ukiup ataatsip matuma siorna aallartippoq, tassa ullumikkut ukioq ataasinngortorsiorluni.
Meeqqat 4000-init amerlanerit Inneruulaq ammarmalli atorluarsimavaat – naatsorsoraanni meeqqat 30-t missaat ullormut takkuttarlutik, Inneruulallu ningiuata, Kirsten Ørgaardip, ukiup ataatsip ingerlasimanera naammagisimaaqaa:
- Meeqqanut kikkunnulluunniit toqqissisimanartumik pilersitsimavugut, inersimasut meeqqat tatigisinnaasaat aamma sulisuupput, Kirsten Ørgaard oqarpoq.
Siunertanut ilaasimavoq meeqqat ornittakkaminnut aamma akisussaassuseqartutut misigisimanissaat, tamannalu iluatsissimavoq:
- Meeqqat aggertartut ilarpassuisa illu namminneq pigalugu misigisimasartut erseqqissorujussuuvoq. Taakkumiuku piat, Kirsten Ørgaard oqarpoq.
Inneruulat ullumikkut nalliuttorsiornermi saniatigut allamik aamma nuannaarutissaqarpoq, tassami Ilaqutariinnermut Pisortaqarfiup 1,4 millioni koruunit immikkoortimmagit – kingullermik immikkoortitanit 400.000 koruuninik amerlanerit.
Tamanna Kirsten Ørgaardip Namminersornerullutik Oqartussanit tuikkut pattalaartinnertut isigaa, aningaasallu taakku Inneruulap ulloq unnuarlu ammasalernissaanut iluaqutaassapput. Inneruulat poorskip kinguninngua ulloq unuarlu ammasalissaaq.