Inneruulamut 1 millioni koruunit

Meeqqat Inuusuttullu ornittagaat, Inneruulaq – Mælkebøtten – Namminersornerullutik Oqartussat Ilaqutariinnermut Pisortaqarfianit 1 millioni koruuninik aningaasaliiffigineqarpoq.

Meeqqanut Inuusuttunullu ajornartorsiutilinnut ornittakkap, Mælkebøtten-ip, ukiuni pingasuni misiliutitut ingerlanneqarnissaa Naalakkersuisut ukioq-manna siusinnerusukkut akuersissutigaat. Taama akuersissuteqarnerup Mælkebøtten periarfissippaa, misileraalluni ingerlatsinissamut aningaasartuutissanik Aningaasanut 2006-mut Inatsimmut qinnuteqarsinnaanissamut. Taassumalu qinnuteqaatip tassa maanna kinguneraa, ukioq-manna ingerlatsinissamut Namminersornerullutik Oqartussat 1 millioni koruuninik aningaasaliinerat.

Mælkebøtten tassaavoq sammisassaqartitsivik nutaaq, ulloq unnuarlu aamma orninneqarsinnaasoq. Sammisassaqartitsivik meeqqanit agguaqatigiissillugu 30-40-nit ullukkut unnukkullu orninneqartarpoq.

Ilaqutariinnermut Pisortaqarfimmit tapiissutit saniatigut Nuup Kommunea ukiuni pingasuni tulliuttuni ukiumut 1 millioni koruuninik tapiisarpoq.