Kommune Kujallermi borgmesteri Simon Simonsen ima oqarpoq:
- Nuannaarutigeqaara aamma neriuppunga, Isumalioqatigiissitap pilersaarutaat piviusunngortinneqassasut.
Kujataani immakkut silaannakkullu angallannerup pitsaanngitsup iluarsartuusiffiginiarneqarnera politikkikkut sammisalinnit iluarusuutigineqarpoq. Isumalioqatigiissitalli siunnersuutigisaa, tassa Qaqortumi mittarfiliortoqassappat 1199 meterisut takitigisumik taava Narsarsuup matuneqarsinnaanissaa, illuatungilerneqarpoq.
- Narsarsuup matuneqarsinnaanissaanik oqariartuuteqarneq, kommunalbestyrelsemi ilaasortaasugut tamatta isumaqatiginngilarput, Simon Simonsen oqarpoq.
Siumumi parteeqqataa Kommune Kujallermilu angallannermut ataatsimiititaliami ilaasortaq Kalistat Lund, Isumalioqatigiissitap Narsarsuup matuneqarsinnaanissaanut oqariartuummut akerliulluinnarpoq.
Qaqortumi 1199-meterisut takitigisumik mittarfiliortoqassappat, kujataaniit atlantikoq qulaallugu timmisartuussisarunnaarnissaq aamma akerleraa.
Atlantikoq qulaallugu Kujataaniit, timmisartuussisarneq unitsineqassappat tamanna takornariaqarnikkut kujataanut eqquinissaa Kalistat Lundimit annilaanngassutigineqarpoq.
- Kujataaniit avataanut attaveqaataasinnaasumik mittarfeqarusuppugut, annilaangassutigaarput naatsumik nunap iluinnaanni mittarfiusinnaassumik mittarfeqalernermi takornariaqarnerup innarlerneqarnissaa. Taamatullu aamma Qaqortumi mittarfissaq 1199-imik takissuseqartussaq, taava qaqugu tallineqassagami? Kalistat Lund oqarpoq.
Assartuusineq pillugu Isumalioqatigiissitap inassutaasa pitsaaqqutaasa ilaat, Simon Simonsenip ima
oqaasertalerpaa.
- Imaatigut angallannerit uterteqqinneqarsinnaanissaat takorlooneqarmat nuannaarutigeqaara, Simon Simonsen oqarpoq.