Innersuussut borgmesterip nuannaarutigaa
Borgmesterip neriuutigaa timmisartoqarfik siunnersuutaasumit takinerusoq sananeqassasoq.
Borgmesterip nuannaarutiginngisaa tassaavoq immakkut angallanerup atorunnaarsinneqarnissaanik siunnersuut.
Qaqortumi mittarfeqalernissaq, Simon Simonsenip qangali sorsuutigisalerpaa, sorsuutigisaa maanna Assartuussineq pillugu Isumalioqatigiisitap taperserpaa.
- Tamanna nuannaarutigaara, tassami ukiuni qulini tamanna sorsuutigisarsimavara. Timmisartukkut angallattut kujataaliartullu 80 procentii Qaqortuliartarput.
Assartuussineq pillugu Isumalioqatigiisitap innersuussutigaa Qaqortumi mittarfik 1199 meterisut takitigissasoq suliareqqaarneqassasoq, naak mittarfiup takinerusup Danmarkimit Kujataanut angallanneq ajornarunnaarsissinnaagaluaraa. Takinerusumik mittarfeqarnerup pissutsit arlallit ajornarunnaarsissinnaagai Simon Simonsen isumaqarpoq, taamaattumik:
- Aningaasassarsiuussineqarpoq. Tassami takinermik mittarfeqalerpat Danmarkimit toqqaannartumik Kujataaliartarneq ajornarunnaaqqissammat, aammalu aatsitassarsiornissaq Kujataani ingerlanneqalissappat, mittarfik takinerusoq pisariaqartinneqartussaavoq.
Assartuussineq pillugu Isumalioqatigiisitap innersuussutaannut ilaavoq Qaqortumit Ilulissat tungaanut immakkut aqqut piaartumik matuneqassasoq. Borgmesterip tamanna paasilluarsinnaagaluarlugu nuannaarutigivallaanngilaa, neriuutigalugu inuiaqatigiit iluminni tamanna oqallisigissagaat:
- Qinersisartut akileraartarnermikkut akilersuisarput, taakkulu kissaatigisinnaavaat taperneqartartumik immakkut angallannerup aaqqiivigineqarsinnaaneranut oqalliseqataassallutik. Tamatuma kingunerisinnaavaa immakkut angallannerup, immaqa imminut akilersinnaanngikkluamik angallassisoqaertarlernissaa. Nalunngilarpummi nunani allani tamanna aamma atorneqartartoq, Kommune Kujallermi Borgmesteri, Simon Simonsen oqarpoq.
Assartuussineq pillugu isumalioqatigiissitap innersuussutai Naalakkersuisut tigoreeraluarlugit nalunaareerput Arctic Umiaq Line amigartooraluarpalluunniit 2011 tamaat angallassisinnaasoq. Taama Naalakkersuisut siulittaasuata Kuupik Kleistip oqarnera Nuuk TV-mi aggutsip naanerani erserpoq.
