Innersuit - suli alutorsaataavoq

Ilisiitsoq iluanngitsoq, Angakkoq piginnaasalik aamma Tupilaat ikiuuttut. Kalaallit oqaluttuatoqaanneersut uummaqqippullusooq, NAPA-p Nunani Avannarlerni Piorsarsimassutsikkut Attaveqaat-ip aamma Kommuneqarfik Sermersuup suleqatigiillutik torrutiinnarlugu isiginnaartitsineq - Innersuit - ilinniartitsissutigeqqilermassuk. Kommuneqarfiup illoqarfiini nunaqarfiinilu innuttaasut 1000-t sinneqartut peqataareerput.
Allattoq Najaaraq Egede
juunip 14-at 2011 07:47

Innersuit Nuummi siorna aalluteqqaarneqarmat meeqqat 70-t peqataapput. Sammisaq ukiormanna nangillugu Kommuneqarfik Sermersuup nunaqarfii Kuumiut, Tiniteqilaaq, Kulusuk, Tasiilaq, Paamiut aamma Nuuk qaammatini kingullerni tikinneqarput. Meeqqat 1058-it aamma ilinniartitsisut perorsaasullu 70-t sinneqartut pananik gummimik sanaanik sakkulerlutik maannamut oqaluttuaatitoqqatta silarsuaaniittuusaarsimasut, NAPA-mit nalunaarutigineqarpoq.

Isiginnaartitsisartut tusagassiortorlu Nuummeersoq Vivi Sørensen Anders Berner Lars Munck-ilu Rollespilsakademiet-meersut peqatigalugit sammisassaqartitsivoq. Rollespilsakademiet tassaavoq torrutiinnarlugu isiginnaartitsinermik ilinniarfik. Taakku saniatigut isiginnaartitsisart Anemarie Ottosen Nuummeersoq suleqataalerpoq. Taanna Nuup atuarfiini meeqqat ilinniartitsisullu isiginnaartitsissummik Innersuarnik sammisaqartitsivoq.

Isiginnaartitsisartut ippassaq Paamiuneeriarlutik  angalanertik naammassillugu Nuummi Katuap silataani tamanut ammasumik tallimanngorpat juunip 17-iani sammisaqartitsissapput.

Aamma atuaruk