Innermik anitsisartoq anitsinngujoortoq
Indonesiami qaqqaq innermik anitsisartoq Merapi anitsinngujoorpoq illoqarfeerarmiullu anitsisartup eqqaani najugaqartut uiffapput.
Nunarsuarmi qaqqat innermik anitsisartut navianarnersaasa ilaat Manerassuarmiittoq Merapimik taagorneqartoq sapaatip-akunnerini kingullerni arlaqalersuni gassimik anngarmillu aniatitsiuarpoq.
Anngaq gassilu ullumi aniasut aatsaat taama inoqarfinnut qanitsigaat.
Merapimiit 7 kilometerisut ungasissusilimmiittut illoqarfeeqqat amerlanersai naviarnartorsiorput.
Illoqarfeeqqat ilaanni pisortat suliffeqarfianni atorfilik franskit nutaarsiassaqartitsiviannut AFP-mut oqarpoq, ussittorsuarmik gassi anialermat illoqarfeeqqami allami innuttaasut uisakajaarsimasut tusarsimallugu.
Arnat naalungissaminnik tigummiarlutik qiaatigalutik bussinik qimarngussuisussanik utaqqisut TV-qarfiup Metrop aallakaateqqammerpai.
Qaqqap innermik sakkortuumik anitsinissaa immikkut ilisimasalinnit ilimagineqarmat illoqarfeeqqani najugallit 8.000-t missaanniittut qimagussorneqareerput.
Nunap immikkoortortaani Yogyakarta-mi maajip 27-ani nuna sajorujussuarmat nunap kujasinnerusortaa kangisinnerusortaalu allanngorujussuarput. Taamanimiilli qaqqaq innermik anitsisartoq Merapi anitsinngujuulerpoq.
