Innermik anitsisartoq
februaarip 08-at 2006 05:22
Alaskami qaqqaq piffissap sikivikitsuinnaap iluani innermik aappassaa anitsisimasoq, Reuterimit allaaserineqarpoq.
Qaqqaq ”Cleveland” 1700 meterinik portussusilik innermik anitsivoq, innermillu anitsinerup nalaani arsakut 7 kilometerisut portutigisumut qaffassimapput.
Tamanna peqqutigalugu Amerikami oqartussat mianersoqqussummik Code Redimik taaneqartartumik atuutilersitsisimapput. Mianersoqqussutinit tamanit taanna sakkortunerpaajusoq atuutilersinneqarmat, innermik anitsisup eqqaani timmisartorneq ulorianartoq erngerluni aamma nalunaarutigineqarpoq.
Kingullermik Clevelandimi innermik anitsisoqarpoq 2001-mi. Alaskami qaqqat innermik anitsillattaasarput, katillugillu 42-riarluni innermik anitsisoqarnikuuvoq.