Innarluutit ersinngitsut maluginiarpaat

Innarluutillit sapaatip akunneqartinneqarnissaat, sapaatip akunnerani 41-mi pisussatut ilaqutariinnermut Naalakkersuisoqarfiup pilersaarusiuleruttorpaa. Tamanna oktobarip arfineq pingajuaniit 14-iata tungaanut pissaaq.
aggustip 08-at 2012 07:16

Ukioq manna qulequtaritinneqartoq tassaavoq "ersinngitsumik innarluuteqarneq", tassalu tarnikkut nappaatit imaaliallaannaq takussaanngitsut tassani pineqarlutik.

Taamatummi innarluutilik tassaasinnaavoq qaratsamigut aqqunarsimasoq, aanaartoorsimasoq imaluunniit unatarterujussuarnerup imaluunniit nakkarluni ajutoornerup kingunerisaanik qaratsamigut innarluuteqalersimasoq.

Aamma imaassinnaavoq ADHD-mik nappaateqartuusut, autist-iullutik imaluunniit tarnimikkut nappaateqartuusut. Tassa nappaataat imaaliallaannaq takuneqarsinnaanngikkaluarluni taakku namminneq inuunerannut avatagiisaannullu sunniuteqartaqaaq.

Aamma innarluutillit sapaatiisa akunnerata oktobarip arfineq pingajuaniit 14-iata tungaanut malunnartinniarneqarneranut atatillugu kattuffiit, eqimattakkaat kiisalu innuttaasut ataasiakkaat arlaatigut suliniuteqarumasut tapiiffigineqarnissaminnut periarfissaqarput.

Suliniuteqarnissanut aningaasat atugassat septembarip qulingat nallertinnagu Ilaqutariinnermut Naalakkersuisoqarfimmut tunniunneqareersimassapput. Qinnuteqaatissanullu immersugassat Naalakkersuisoqarfiup nittartagaani www.ipis.gl -imut iserluni pissarsiarineqarsinnaallutik.