Innarluutillit Ulluat malunnartinneqanngilaq
Ullumi ulloq decembarip ulluisa pingajuat innarluutillit ulluat nalliussinagu innarluutillit nunatsinni sapaatip-akunneqartinnissaat aalajangerneqarsimavoq, tamannalu sap-ak. 41-mi pivoq. Nunatsinni kingumut qulequtaritinneqarpoq, innarluutillit ilinniarsinnaatitaanerat suliffeqarsinnaatitaanerallu.
Sinerissami arlaannik ullumi pisussanik aaqqissuisoqarsimanersoq paasiniarlugu sianeqattaarnitsinni iluatsitsinngilagut.
- Uagut ukiut tamaasa innarluutillit ulluat nalliussiniarlugu Sisimiuni kaffillertaraluarpugut, ukiormannali periarfissaqannginnatta aaqqissuussinngitsoorpugut, aamma nuna tamakkerlugu pisussamik, Peter Mikaelsen, nunatsinni Innarluutillit Kattuffianni siulittaasoq oqarpoq.
- Innarluutillilli puigorneqanngillat. Maani Sisimiuni meeqqat innarluutillit inaanni ”Ivik”-mi juullerpalaartitsissaagut decembarip ulluisa 13-ianni, oqarpoq.
Nunarsuaq tamakkerlugu innarluutillit 1992-imi ulloqartinneqartalerput, ukiullu tamarmik assigiinngitsunik qulequtaqartinneqartarput, tamarmilli innarluutillit politikkut, inunnik isumaginninnikkut, aningaasaqarnikkut kulturikkullu sulinermi akuutinneqarnissaannik siunertaqartarput. Ukiormanna qulequtaavoq inunnut tamanut naleqassuseq naapertuilluarnerlu.
Assersuutigalugu EU-Kommisioni Bruxellesimi ulluni marlunni ataatsimeersuartitsissaaq inunnik immikkoortitsisarnerup akiornissaa oqaluuserisassani pingaarnersaatillugu.
Innarluutillit kattuffii suleqatigalugit ataatsimeersuarneq aaqqissuunneqarpoq. Takoqqusaarutillu oqariartuutaat qularutissanngillat. ”Assigiinngisitaarneq atorluarli. Immikkoortitsisarneq unitsilli!” Taama oqariartornikkut inuttut pisinnaatitaaffeqarneq pisussaaffeqarnerlu ersersinniarneqarput, immikkoortitaannginnissaq inuillu tamarmik assigiinngissusiisa ajunngequtai maluginiaqquneqarlutik.
