Innarluutillit politikkilerpaat
Sisimiut Maniitsullu kommuniisa kommuninik nutaamik aaqqissuusseqqinnissap periarfissat nutaat pilersitai atorluarniarlugit aallartereerput. Takussutissatut siullertut ataatsimoorluni innarluutilinnut politikkissaq Sisimiuni isumaginninnermut ataatsimiititaliap akuersissutigeqqammerpaa. Aamma taanna Maniitsumi isumaginninnermut ataatsimiititaliamit oqaluuserineqassaaq, kommunalbestyrelsillu kattuttussat marluusut januaarimi ataatsimeeqatigiilerpata akuersissutigivinneqassalluni.
- Illoqarfiit taama imminnut ungasitsigitigitillugit kommuninik kattussuutsitsinissaq imaannaanngitsorujussuussaaq, Maniitsumi isumaginninnermut pisortaq Gunnar Vinge-Hansen Sermitsiamut oqarpoq. Kisianni qarasaasiakkut attaveqaqatigiinnerit, telefaxit, tusarniaanerit attaveqaqatigiilluarnerlu iluaqutigalugit minnerunngitsumillu ukiarmanna innaarluutillit pillugit ataatsimeersuartitsisoqarneratigut, kommunit killeqarfigigallagaat aporfiginagit politikkimik ataatsimoorussamik pilersitsiniartoqalerpoq.
Innarluutilinnut politikimi ilaapput innarluutillit pillugit siunnersuisoqatigiit innarluutilinnullu centerissaq.
Innarluutillit Peqatigiiffiata siulittaasuata Karl Mikkelsenip siunnersuisoqatigiit tamakkulu tungaasigut politiki nutaaq pitsaalluinnarnerarpai.
- Ukiorpassuarni siunnersuisoqatigeeqarnissaanik centeriliortoqarnissaanillu ujartuinikuuvugut. Siunnersuisoqatigiit siunnersuisartuunermik saniatigut aamma innarluutillit sinnerlugit oqaaseqartartuussapput, Karl Mikkelsen Sermitsiamut oqarpoq.
