Innarluutillit pisinnaatitaaffii eqqumaffigeqquai
Tamanna ilinniartitaanermut naalakkersuisumit Mimi Karlsenimit sakkortuumik maluginiaqquneqarpoq.
§ 36 najoqqutaralugu apeqqummi akissut taannaajuarpoq. Matumani inatsisartunut ilaasortap IA-meersup Debora Kleistip innarluutillit immikkut atuartinneqartarnerisa aaqqiivigineqarnissaannut naalakkersuisut pilersaaruteqarnersut apeqqutigaa.
Innarluutillit immikkut atuartinneqarnissaasa neqeroorutiginissaannut kommunit pisussaaffeqarput. Allaammi innarluutillip najugaanut sapinngisamik qanittumi.
Taamaattorli innarluutillit amerlaqisut taakkualu ilaqutaasa, kommunit atuartitsinissamut ilinniarnissamulluunniit innersuussisannginnerat siusinaartumilluunniit pensionisiaqalernissamut innersuussiinnartarnerat malugisarpaat, Debora Kleist uparuaavoq.
- Kommunit Inatsisit naapertorlugit innarluutilinnut sunik pisussaaffeqarnersut Naalakkersuisut erseqqissaatigerusuppaat, tamannalu Mimi Karlsenimit pingasoriarluni oqaatigineqartarpoq.
Aammattaaq suliassaqarfimmi tassani inatsisit nalilersorneqassapput. Naalakkersuisut tamatuma kingorna nalilissavaat innarluutillit inatsisitigut inissisimanerat qulakkeerniarlugu paragraffit amerlanerusut ilanngunneqarnissaat pisariaqarnersoq.
