Innarluutillit pillugit ataatsimeersuarneq

Ataasinngornermi 14. maj 2007 Ilaqutariinnermut Inatsinillu Atortitsinermut naalakkersuisup Aleqa Hammondip ammassavaa innarluutillit pillugit 2007-imi ataatsimeersuartitsinissaq, Nuummi kulturikkut illorsuarmi Katuami ingerlanneqartussaq. Inuit 90-it sinneqalaartut sinerissameersut Nuummeersullu ataatsimeersuarneq peqataaffigissavaat, taamalu innuttaaqatitta innarluutillit inuuniarnerminni atugarisaat oqallisigissallugit.

Immikkut sammineqartussaapput nunatsinni innarluutillit ilinniartitaanerat, suliffeqarnerat sunngiffimmilu sammisassaat, innarluutillit sinniisuinit, immikkut oqalugiariartortitanit, sullissisunit kiisalu qinikkanit pissutsit atuuttut, periarfissat akimmiffiusinnaasartullu qulequttamut tunngasut oqallissutaassallutik.

Ataatsimeersuarnermut atatillugu saqqummersitsineq ”Siunissamut sinnattukka” sapaammi 13. maj 2007 ammarneqarpoq, saqqummersitsisuullutik meeqqat, inuusuttut inersimasullu innarluutillit sinerissami sumiiffinnit assigiinngitsuneersut. Suliat meeqqerivinneersut, atuarfinneersut, paaqqinniffinneersut inunnillu ataasiakkaanersut saqqummersinneqarput.

-Meeqqat, inuusuttut inersimasullu piginnaanermikkut arlaannik innarluuteqalersimasut taamatut suliaqarnissaminnut killilerujussuarmik periarfissaqarsinnaasarput. Tamanna amerlaqisugut nalinginnaasumik inuunillit taamatullu innarluuteqanngitsut eqqarsaatigisanngilarput – ulluinnarni inuuneq innarluutilinnut, qanigisaasunut ikiortinullu qanoq ajornakusoorsinnaatigisoq, naalakkersuisunut ilaasortaq Aleqa Hammond ammaalluni oqalugiarnermini ilaatigut taama oqarpoq kajumissaarutigalugulu unikaallalluni alutorsarnissamut, eqqumiigisaqarnissamut, nuannaaruteqarnissamut periarfissiinissamullu piffissaqalaarniarnissaq, pingaartumik inoqativut allarujussuarnik inuuniarnermi atugassaqartitaasut pineqartillugit.

Meeqqat inuusuttullu innarluutillit suliaannik saqqummersitsineq Katuamut takuniarneqassinnaassaaq 2007-imi maajip ulluisa 25-at ilanngullugu.

Ilanngullugu nassiunneqarpoq ataatsimeersuarnissap programmia. Ataatsimeersuarneq tusagassiortunut ammavoq.