Atuarniarnikkut sanngiitsumik inissisimasut 2.-3. klassiunerannili misilinneqartarnissaat pingaaruteqartoq, nunatsinni innarluutillit peqatigiiffiinut siulittaasoq, Anders Meilvang tusagassiuutinut nalunaarummi allappoq

Innarluutillit peqatigiiffiata siulittaasua: Kalaallinut naqinnernik ilisarinnissinnaanngitsunut misiliummik inerisaasoqarli

Innuttaasunit 5 procentimit 10 procentimut naqinnernik ilisarinnissinnaanngitsuupput – taakkununnga ikiorsiissutissaqanngitsoq, nunatsinni innarluutillit peqatigiiffii isumaqarput.

Nuna tamakkerlugu naqinnernik ilisarinnissinnaanngitsunut misiliummik MASSAKKUT inerisaasoqarli.

Nunatsinni innarluutillit peqatigiiffii tusagassiuutinut taama nalunaaruteqarput.

Naqinnernik ilisarinnissinnaanngitsunut nunatsinni misiliuteqanngilaq, taamaammat naqinnernik ilisarinnissinnaanngitsut pisariaqartitaminnik ikiorneqarneq ajorput.

- Oqaatsitsinnut nunatsinnullu naleqqussakkamik naqinnernik ilisarinnissinnaanngitsunut misiliummik suna tamaat atorlugu naammassillugu inerisaanissaq Ilinniartitaanermut Aqutsisoqarfimmiit massakkut isumagineqartariaqarpoq, nunatsinni innarluutillit peqatigiiffiinut siulittaasoq, Anders Meilvang tusagassiuutinut nalunaarummi allappoq.

AAMMA ATUARUK Naqinnernik ilisarinnissinnaanngitsunut periusissiortoqalerpoq

- Atuarniarnikkut sanngiitsumik inissisimasut 2.-3. klassiunerannili misilinneqartarnissaat, tamatumalu kingorna ikiuutit tapersersuinerlu pisariaqartoq inississallugit aalajangiisuulluinnarsinnaavoq. Meeqqat naqinnernik ilisarinnissinnaannginnerat uppernarsineqarmat taakkununnga angajoqqaajusut meeqqaminnik tapersersuinissaannut sakkussaannik tunineqarnissaat taamatulli pingaaruteqartigivoq.

Meeqqaut ikiorsiissuteqartoqalingajalersoq

Naqinnernik ilisarinnissinnaannginneq innarluutaavoq nalinginnaasorujussuaq. Innuttaasut 5 procentiinit 10 procentiinut naqinnernik ilisarinnissinnaanngitsuussangatinneqartut, innarluutillit peqatigiiffiisa oqaatigaat.

Inuit innarluutillit tapersersorneqarnissaat aqqutissiiuunneqarnissaallu kommunit pisussaaffigigaat, innarluutillit peqatigiiffiata oqaatigaa.

- Eqqortumik ikorfartuinikkut naqinnernik ilisarinnissinnaanngitsut aatsaat ilinniagaqalersinnaapput, taamaasillutillu inuttut piginnaasatik inuiaqatigiinnut inuttullu namminermut iluaqutissanngortissinnaallugit.

Ikiorsiissuteqartoqangajalersorli, naalakkersuisup, Ane Lone Baggerip (S) Sermitsiaq.ag-imut oqaatigaa. 

Taassumali naqinnernik ilisarinnissinnaanngitsunut misiliummik kalaallisut oqaatsinik sumiorpaluussutsimillu ukkatarinnittumik suli piareersimasoqanngitsoq oqaatigaa.

- Oqaatsigut allanit assigineqanngillat. Assersuutigalugu qallunaat misiliutaat kalaallisuumut nuuginnarsinnaanngilarput, oqaatsit sannaat assigiinngimmata, ilinniartitaanermut naalakkersuisoq Ane Lone Bagger Sermitsiaq.ag-imut oqarpoq.

Atortussat taamaallaat meeqqanoortut.

Naalakkersuisut naqinnernik ilisarinnissinnaanngitsunut iliuusissamik pilersaarusiamik 2012-mili misissuilerput. Taassuma ukioq manna naammassinissaa naatsorsuutigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat