Innarluutillit inuusuttunngulersut ornittagassaat sulisullu amigaataapput

Innarluutillit meeqqat atuarfiinit atuarunnaartut ingerlariaqqinnissaannut periarfissaat nunatsinni amigaatigineqarput. Innarluutillit ineriartornissaannut sulisussat ilinniarsimasut, ornittagassaat, ilaqutariillu avataanni tapersersortit amigaatigineqarput. Periarfissat amigaataanerat pissutigalugu, ilaqutariit ilaat Danmark-imut aallarnissaminnik eqqarsaateqarput, Danmark-imi innarluutilinnut sullissinneq periarfissarissaarnerummat.

Innarluutillit pillugit ataatsimeersuarneq Katuami ingerlanneqarpoq, sinerissamit tamarmit peqataaffigineqartoq. Nuup Kommuneani innarluutillit isumaginnittoqarfiani pisortaq Pauline Abelsen aperaarput, innarluutillit meeqqat atuarfiinit atuarunnaarnikut maannakkut sunik sammisassaqartinneqartarnersut:

"ajoraluartumik massakkut imatut inissisimavugut angajoqqaavisa illui atorlugit, tapersersortit sulisittariaqartarpagut, taakkua saniatigut makkua illoqarfimmi sammisassaqartitsiviit Fit og Fun aamma naluttarfik allallu orninnneqarsinnaasut atorluarniatarpagut", Pauline Abelsen oqarpoq. Innarluutilinnik sullissisunik sulisussaqarniarneq apeqqutaatinneqartuaannassasoq, Pauline Abelsen-ip oqaatigaa. Innarluutillit ornittagassaat, Nuummi atulersussap, ammarneqariarpat sulilersussat piumasaqaatitaqarput, aammallu sulilerumallutik soqutiginnittut saaffiginnittalereersimapput. Ilaqutariit innarluutilinnik meerallit Danmark-imut nuunnissaminnik eqqarsaateqartoqarpoq, Danmark-imi innarluutilinnut kiffartuussineq pitsaanerummat. Pauline Abelsen radioaviisimut oqarpoq, maannakkukt innarluutilimmik Danmark-imiititaqarlutik efterskolertitsillutik, ukiut pingasut qaangiuppata nunatsinnut utertussaq, nammineersinnaalernissaalu siunertaalluni. Danmarkiliartitsisarnissaq Nuuk kommuneani innarluutillit immikkoortortaqarfianit tapersersorneqarpoq oqaatsit aporfiussanngippata, innarluutilimmut iluaqutaasimappat. Innarluutillit naammattumik sullinneqarnerat anguneqarsinnaavoq, sulisut ilinniarsimasut naammattut pigilerutsigit, Nuuk kommuneani innaarluutillit immikkoortortaqarfiani pisortaq Pauline Abelsen, oqarpoq.

Innarluutillit ornittagassaanik illumik naleqquttumik Nuuk kommunea maanna ujaasivoq, Namminersornerullutik Oqartussat akuersippata atulersussamik.