Innarluutillit inatsisiliuunneqarnissaat angorusunneqarpoq

Tarnimikkut innarluutillit meeqqat atuarfiini atuartut, toqqissillutik pilersaarusiorluakkamillu ingerlaaseqarnissaat ataqqinngivillugu atuartinneqartarput , anaanaasoq oqarpoq
Allattoq Jaaku Lyberth
januaarip 29-at 2008 16:57

Tallimanngormat Namminersornerullutik Oqartussani atuartitaanermut pisortaqarfimmi immikkoortortaqarfimmi pisortaq oqarpoq atuarfitsialammi Tarnimikkut Innarluutillit immikkut inatsisiliuunneqartariaqanngitsut immikkut annertusisamik atuartitsinikkut aaqqiissuteqarluni isumagineqarluarsinnaammata.

Tamannali anaasaasup Eva Olsenip akerlilerpaa. Eva Olsenip atuarfiit tallimat missaat panimminut ADHD Asbergerimillu innarluutilimmut misilittagaqarfigai maannakkullu Ilulissaniit Aasiannut nuunnerminnut atatillugu atuarfeqarfinni aaqqiisarnerit Ilulissanilu Specialcenterip tunniussinnaasai aallaavigalugit atuarfeqarfiit allat ima naliliiffigai:

”Allaanerusorujussuupput aaqqissuussaannginnerujussuupput sinerissamiittut atuarfiit. Meeraq, tassami innarluutillit uatsitut naatsorsuuteqarsinnaanngitsut allanngortitseriataarnermut allanngortitsinissaminnut imaluunniit arlaannik suliaqarnissaminnut pilersaarutai killillit meeqqat nalusarpaat sunissartik taamaalillutik ineriartornerat killeqalertarpoq”.

Ilisimaneqareerpoq ADHD-mik Asbergerimillu innarluutillit toqqissisimasumik killilersorluakkamik pilersaarusiorluakkamik siunertamillu nassuiarluakkamik pineqartussaasut.

Tamannali tassa sinerissami atuarfeqarfinni allani Eva Olsenip panimminut innarluuteqartumut atorsinnaasimanngilaa, taamaammallu tarnimikkut innarluutillit atuarfitsialaap iluani immikkut atuartitsinermut annertusisamik taaginnarlugu inissiiginnartarlutik ingerlatsisarenrit amigarnerarpaa, tarnimikkut innarluutilinnut immikkut inatsisiliortoqarnissaa angorusuppaa.

Tarnimikkullu Innarluutillit immikkut meeqqat atuarfeqalernissaat pillugu ima oqarpoq:

”Angajoqqaatut toqqissisimanassagalarupoq meeqqamullu oqarsinnaalluni tassaniissinnaasoq kisiartaanngitsuuppallu sinerissami kisimi taamatut ingerlattitsisut arlaliusuugunik iluassagaluarpoq" innarluutilimmut anaanaasoq Eva Olsen oqarpoq.