Innarluutillit Illersuisuata Christine Johnsenip Kommune Kujallermi angalanerminit nalunaarusiani ullumi saqqummersippaa.Assi: Tilioq

Innarluutillit illersuisuat: Innarluutillit Kommune Kujallermi atugarliorput

Innarluutilinnut atugassarititat ajorluinnartut Innarluutilinnut illersuisup Kommune Kujallermi angalanermini naammattuugaasa ilagaat.

Ulluinnarni pisariaqartitanut ikiorneqarnissamut qinnuteqaatit itigartitsissutigineqartut, inigisat naleqqutinngitsut, sullissisut tulluanngitsut sullissisussaaleqinerluunniit. Tassa innarluutillit illersuisuata Kommune Kujallermi angalanermini naammattuugaasa ilaat. Angalanermiillu nalunaarusiaq maanna saqqummerpoq.

Sulisussaaleqineq taamatullu innarluutilinnut ikiortissaaleqineq ajornartorsiutaanerpaasut ilagaat.

"Oqaluttuarineqarpoq ikiuineq tapiisarnerlu unitsinneqarsimasut sulisussaaleqineq pissutigalugu, aaqqiissutissamik suliniuteqarani" Tilioq nalunaarusiami ilaatigut taama allappoq.

Imminiiginnagaasutut misigisartut

Ikiortissaaleqineq tapersersortissaaleqinerullu kinguneranik innarluutilippassuit imminiiginnarneqartarnerannik kinguneqarpoq.

AAMMA ATUARUK Angalaniarnerni pissutsit innarluutilinnut naammaginanngitsut

"Arlallit pisortanit ikiortinnissamik qinnuteqarsimapput ikiortinnissamullu itigartinneqarsimallutik. Tiliup naapippai amerlasuut utoqqalinerminni innarluuteqalersimasut illoqarfimmi nunaqarfimmilluunnit angalassallutik sapersartut", nalunaarusiami allassimavoq.

Innarluutillilli kisimiinngillat ulluinnarni inuuniarnerminni unammilligassaqartut.

Angallannermut aaqqissuussaqanngitsoq

Inuimmi utoqqalinerminni tusillassimasut isigiarsuttunngorsimasulluunniit ikiorneqarniarnerat aamma ajornakusoorpoq.

AAMMA ATUARUK Inuit innarluutillit illersuisuat illoqarfinnut nunaqarfinnullu angalalerpoq

"Illoqarfiit nunaqarfiillu ilaanni pitsorluttut angallanneqarnissaannut periarfissaqanngillat naak inatsit malillugu periarfissaqartussaagaluartut. Taamaattoqarnera kiserliornermik, immikkoortitaasut inuiaqatigiinnullu akuujunnaartutut misigisimanermik kinguneqarsinnaavoq. Innarluutillimmi pisunut akuunissaminnut periarfissakittarput, tarsanimmi ingerlatsinnissat akisuallaalersinnaasarmata".

Innarluutilinnut illersuisup angalanermini Kommune Kujallermi ineqarfiit, sannaviit namminersortullu ilaatigut pulaarpai.

Nalunaarutsiaq uani atuarneqarsinnaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat