Innarluutillit ilinniarfeqaleqquaat
Ukiut qulit missaat qaangiuppata ilinniarfeqalernissaq piviusunngortinneqassasoq Innarluutillit Kattuffiata anguniarusuppaa. Innarluutillit kartuffiata siulittaasua Mette Sofie Lerch ima oqarpoq.
- Kattuffimmi qangali anguniagarivarput immikkut innarluutillit ilinniarfeqalernissaat, innarluutilinnut tulluussakkamik taavalu allagartartaarfiusinnaasumik, Innarluutillit Kattuffianni siulittaasoq oqarpoq.
Ilinniarfik inuit innarluutillit inuiaqatigiinni allatulli sulisinnaanissaat eqqarsaatigalugu piginnaasaallu apeqqutaatillugu atuarfiussaaq.
- Takorloorparput kingunerissagaa innarluutillit tiimialunni sulisinnaassasut immaqa sapaatip-akunneranut 10-20 tiimit amerlanerusunilluunniit. Taamatut takorloorparput, oqarpoq.
Innarluutillit ilinniarfiat pilersinneqaruni kamippaliortutut skomageritut aamma pequsianik aaqqissuisartutut allatulluunniit assassornermik atuarfiusussatut takorloorneqarpoq.
- Soorlu uagut eqqarsaatiginerugatsigit arlaatigut assassornermik pikkoriffeqartut atuagarsorneruffiusunulli ilinniarfinnut isernissamut angummassinnaanngitsut, Mette Sofie Lerch oqarpoq.
Innarluutillit ilinniarfiat ukiut qulit 15-illuunniit missaat qaangiuppata pilersinneqaruni nunamit tamarmeersunit iserfigineqarsinnaanera aamma eqqarsaataavoq.
- Nuna tamakkerlugu ilinniarfissatut takorloorparput, apeqqutaassanngilaq suminngaanneerneq. Kisiannili apeqqutaassaaq innarluutillip nammineq ilinniarusussusia imaluunniit tapersersortit - siunnersorluarneqarnermikkut - ikiuunnerisigut ilinniarsinnaanera, taamaalillutik ilinniarfimmut tassunga takorluukkatsinnut ilinniartunngorsinnaallutik.
Mette Sofie Lerch aamma oqarpoq, innarluutillit ilinniarfeqalernissaannut tunngasumik naalakkersuisut 2003-mili oqaluuttareeritik. Kattuffimmiit Ilaqutariinnermut naalakkersuisoq qanittukkut Nuummi ilaatigut ilinniarfeqalernissaq pillugu oqaloqatigineqarpoq.